მედიაში გავრცელდა რუსეთში მოღვაწე ბიზნესმენისა და პრორუსული პარტია სოლიდარობა მშვიდობისთვის ერთ-ერთი ლიდერის, მამუკა ფიფიას და, როგორც თავად წარადგენს თავს, ქართული ოცნების წარმომადგენლის, პაატა აბულაძის ინტერვიუ, სადაც ის აცხადებს, რომ დასავლეთი საქართველოს ომში ჩართვას აიძულებდა.

ამას გარდა, პაატა აბულაძის თქმით, "რუსეთი იყო, არის და იქნება უსაფრთხოების გარანტი რეგიონში" და "საჭიროა დიპლომატიური კავშირის აღდგენა".

მამუკა ფიფია და პაატა აბულაძე

მამუკა ფიფია და პაატა აბულაძე

ფოტო: ეროვნული ერთიანობის კლუბი

აღსანიშნავია, რომ ინტერვიუ "ეროვნული ერთიანობის კლუბშია" ჩაწერილი და, როგორც "ტვ პირველი" იუწყება, შემდეგ რუსული ტელევიზიით გადაიცა.

"ჩვენ ასეთი არჩევანის წინაშე ვიყავით: ან საქართველო ფიზიკურად არ იარსებებს, ან საქართველო იცოცხლებს. ჩვენ რომ მათ ზეწოლას დავყოლოდით, ჩვენ აქ არ ვისხდებოდით და საქართველო რუკაზე არ იარსებებდა. ის, რომ ისინი გვიბიძგებდნენ ომისკენ ღიად, შეულამაზებლად. მე ვარ მოწმე. მე არ ვამბობ, რომ ვინმემ მითხრა, ჩემი ყურით ვისმენდი. მე მმართველ პარტიას წარმოვადგენ. იმასაც კი გვეუბნებოდნენ, რომ 3 დღეს ხომ მაინც გაძლებთ, სამი დღის შემდეგ პარტიზანულ ომს დაიწყებთო.

საჭიროა დიპლომატიური კავშირის აღდგენა. იმიტომ, რომ ის [დასავლური] სამყარო ჩვენი სამყარო არ არის. ეიფელთან და "ბიგ ბენთან" როგორ ფოტოებსაც არ უნდა იღებდნენ, ისინი უცხო ადამიანები არიან. დიახ, ჩვენ ჩვენი სპეციალური საბრძოლო მოქმედება დავიწყეთ. ჩვენ ვაკეთებდით ჩვენს დერუსოფობიზაციას, ჩვენი დელიბერალიზაციას. ე.წ. ბრძოლა მოვიგეთ და არა ომი. ახლა ისინი ეთნოკონფლიქტებზეც მიდიან. დიახ, ასეთის საფრთხეც არის.

ჩვენ ძალიან ვიმედოვნებთ, რომ რუსეთი ძალიან მგრძნობიარედ და სერიოზულად აკვირდება ვითარებას რეგიონში, რადგან რუსეთი იყო უსაფრთხოების გარანტი რეგიონში — არის და იქნება მომავალშიც. ამიტომ, ძალიან დიდი იმედი მაქვს, რომ ჩვენი რუსი პარტნიორები იქნებიან ჩვენს გვერდით ნებისმიერ შემთხვევაში", — ამბობს პაატა აბულაძე.

პაატა აბულაძე ქართული ოცნების წარმომადგენლად და სამხედრო ექსპერტადაა წარმოდგენილი "ეროვნული ერთიანობის კლუბის" ვებგვერდზე და ისიც და მამუკა ფიფიაც ამავე კლუბის წევრები არიან.

"ეროვნული ერთიანობის კლუბის" წევრებია არიან ასევე პუტინის პროპაგანდისტი ფილოსოფოსი და პოლიტოლოგი ალექსანდრ დუგინი და ოკუპირებული სამხრეთ ოსეთის მეორე პრეზიდენტი ედუარდ კოკოითი და სწორედ აქვეა წარმოდგენილი ნახსენები ინტერვიუს ფოტოებიც.

მამუკა ფიფია

მამუკა ფიფია

ფოტო: ეროვნული ერთიანობის კლუბი

აღსანიშნავია, რომ პაატა აბულაძის ორივე შვილი რუსეთ-უკრაინის ომში რუსეთის რიგებში იბრძვის და პრორუსები მას ხშირად "ჯარისკაცის მამას" ადარებენ. ამას გარდა, პაატა აბულაძე თბილისის მერისა და ქართული ოცნების გენერალური მდივნის, კახა კალაძის დის ქმარია.