"თუ უკრაინაში ომის დასრულება შეუძლებელი იქნება, უნდა გავეცალოთ", —CNN-ის ცნობით, ამის შესახებ აშშ-ის სახელმწიფო მდივანმა, მარკო რუბიომ ჟურნალისტებს პარიზიდან გამგზავრებამდე განუცხადა.

"თუ უკრაინაში ომის დასრულება შეუძლებელი იქნება, უნდა გავეცალოთ. ახლა ძალიან სწრაფად უნდა განვსაზღვროთ, და მე ვსაუბრობ დღეების საკითხზე, შესაძლებელია თუ არა ამის გაკეთება. თუ ეს შეუძლებელია, თუ ჩვენ იმდენად შორს ვართ ერთმანეთისგან, რომ ეს არ მოხდება, მაშინ ვფიქრობ, პრეზიდენტი ალბათ იმ ეტაპზეა, როდესაც იტყვის, რომ ჩვენ დავასრულეთ", — განაცხადა მარკო რუბიომ.

მისი თქმით, ბოლო 3 წლის განმავლობაში აშშ ეხმარებოდა უკრაინას, მაგრამ ეს "მათი ომი არაა".

"ეს ჩვენი ომი არ არის. ჩვენ არ დაგვიწყია. შეერთებული შტატები ბოლო სამი წლის განმავლობაში ეხმარებოდა უკრაინას და ჩვენ გვსურს მისი დასრულება, მაგრამ ეს ჩვენი ომი არ არის", — დასძინა მან.

"პრეზიდენტმა (ტრამპმა) 87 დღე გაატარა ამ მთავრობის უმაღლეს თანამდებობაზე და ბევრი იბრძოლა ამ ომის დასასრულებლად. ახლა ჩვენ მივაღწიეთ წერტილს, როდესაც უნდა გადავწყვიტოთ და დავადგინოთ, შესაძლებელია თუ არა ეს საერთოდ. სწორედ ამიტომ ვთანამშრომლობთ ორივე მხარესთან", — თქვა მარკო რუბიომ.

ამასობაში, რუსეთმა ღამით უკრაინაზე, ხარკოვის საცხოვრებელ უბანზე სარაკეტო თავდასხმა განახორციელა. უკრაინის ხელისუფლების განცხადებით, დარტყმის შედეგად ერთი ადამიანი დაიღუპა და 67 დაიჭრა, დასძინეს, რომ შიშობენ, რომ დაზიანებული საცხოვრებელი კორპუსის ნანგრევების ქვეშ შესაძლოა მეტი ადამიანი იყოს ჩარჩენილი.