ეუთოს დემოკრატიული ინსტიტუტებისა და ადამიანის უფლებების ოფისი (ODIHR) ადგილობრივი თვითმმართველობის არჩევნების სადამკვირვებლო მისიას იწყებს. მისიის ხელმძღვანელის, კორიენ იონკერის თქმით, ძირითად სადამკვირვებლო ჯგუფში თბილისში მყოფი 14 ექსპერტისგან შედის

"20 სექტემბრიდან 22 გრძევადიანი ექსპერტებისგან შემდგარი ორკაციანი ჯგუფები ქვეყნის მასშტაბით გადანაწილდებიან. ასევე, ეუთოს მონაწილე ქვეყნებს 350 მოკლევადიანი დამკვირვებლის გამოგზავნა ვთხოვეთ და ისინი არჩევნებამდე რამდენიმე დღით ადრე ჩამოვლენ."

იონკერის განცხადებით, დამკვირვებლები მონიტორინგს გაუწევენ კანდიდატებისა და ამომრჩევლების რეგისტრაციას, საარჩევნო კამპანიის აქტივობებს, საარჩევნო ადმინისტრაციისა და შესაბამისი სამთავრობო ორგანოების საქმიანობას, არჩევნებთან დაკავშირებულ კანონმდებლობასა და მის შესრულებას, ასევე, არჩევნებთან დაკავშირებულ დავებს. დაკვირვების ფარგლებში, მისია მონიტორინგს გაუწევს მედიის მიერ საარჩევნო კამპანიის გაშუქებას.

მედიაანალიტიკოსის ივან გოდარსკის თქმით, ისინი დააკვირდებიან ძირითად სატელევიზიო არხებს, ბეჭდურ-და ონლაინმედიას, კვლევა კი იქნება როგორც თვისებრივი, ასევე რაოდენობრივი.

მისიის ფარგლებში, მისიის წევრები შეხვდებიან სახელმწიფო და პოლიტიკური პარტიების წარმომადგენლებს, კანდიდატებს, სამოქალაქო სექტორის, მედიისა და საერთაშორისო ორგანიზაციების წარმომადგენლებს.

ODIHR დაკვირვების საბოლოო ანგარიშს საარჩევნო პროცესის დასრულებიდან რვა კვირაში გამოაქვეყნებს. ადგილობრივი თვითმმართველობის არჩევნები 21 ოქტომბერს ჩატარდება.