საქართველოს პრეზიდენტი, გიორგი მარგველაშვილი აცხადებს, რომ რუსული პროპაგანდა საქართველოში განსხვავებულის მიუღებლობის დამკვიდრებას ცდილობს, რასაც საქართველო უნდა შეეწინააღმდეგოს ძლიერი იდენტობით, რომელიც "განსხვავებულის მიმღებლობას და ტოლერანტობას ეფუძნება." ამის შესახებ პრეზიდენტმა თბილისის საერთაშორისო კონფერენციაზე ისაუბრა.

პრეზიდენტის თქმით, საქართველო დიდი ისტორიის მქონე ქვეყანაა და დღეს მის წინაშე დგას გამოწვევა დაამკვიდროს ევროპული ფასეულობები და გახდეს დასავლური სამყაროს ნაწილი. მისი განცხადებით, ქართული კულტურა ინდივიდუალიზმსა და თავისუფლებას ეფუძნება.

"ჩვენ ვართ ერი, რომელიც საკმაოდ აქტიურად იცავდა საკუთარ თავს და ცდილობდა შეენარჩუნებინა საკუთარი იდენტობა და განევითარებინა ის იმ ისტორიულ პროცესში, რომელიც ძირითადად მიზანმიმართული იყო ამ ერის უნიკალურობის განადგურებისაკენ…" - აღნიშნა პრეზიდენტმა და თქვა, რომ საზოგადოებამ უნდა მიიღოს ის ფაქტი, რომ სხვა ადამიანებიც, რელიგიური და ეთნიკური იდენტობისა და სექსუალური ორიენტაციის მიუხედავად, ქართული კულტურის ნაწილი არიან. განსხვავებულობის მიუღებლობა კი, მარგველაშვილის თქმით, ქართველი ერის კოლაფსს ნიშნავს.

საქართველოს პრეზიდენტის განცხადებით, რუსეთის ნარატივი მკაფიო და ნათელია - მიმართულია გატეხოს ქართული საზოგადოების მორალი, შეაგუოს ტერიტორიების ოკუპაციის ფაქტს და ამ ახალი რეალობით მიგვიყვანოს მოლაპარაკების მაგიდასთან.

გიორგი მარგველაშვილი აცხადებს, რომ საქართველო იმსახურებს უფროძლიერ და აქტიურ საერთაშორისო მხარდაჭერას, რადგან საქართველო მზადაა დაიცვას ევროპული ფასეულობები და დაუპირისპირდეს რუსულ ძალას.