წელს თბილისში მესამედან მეთორმეტე მოსწავლეებისთვის თავისუფალი ოლიმპიადა ჩატარდება. მოზარდები ტესტებს ქართულ ენაში, მათემატიკასა და ინგლისურში გაივლიან.

ტესტების 50 პროცენტი სასკოლო მასალის მიხედვით იქნება შედგენილი, 50%-ით კი ზოგადი ცოდნა შემოწმდება.

ერთ-ერთი ორგანიზატორის თქმით, ოლიმპიადის მთავარი პრიზი ჰოვერბორდია.

"სულ 90 გამარჯვებული გვეყოლება, 30 მონაწილე გავა პირველ ადგილზე და ისინი ჰოვერბორდებს მიიღებენ" - უთხრა On.ge-ს მარიამ დევრისაშვილმა.

მეორე და მესამე ადგილზე გასულები მიიღებენ უფასო სასწავლო კურსებს, ატრაქციონებისა და კინო-თეატრების ვაუჩერებს, ფასდაკლების ბარათებს სხვადასხვა კომპანიებისგან და ა.შ.

საგნებზე რეგისტრაცია 18 სექტემბერს იწყება. მანამდე კი, მსურველებს სიახლეების გამოწერა შეუძლიათ საიტზე მეილის მითითებით.

ოლიმპიადაში მონაწილეობის მიღება საქართველოს ნებისმიერი რეგიონიდან ჩასულ მოსწავლეს შეუძლია. პირველ ტურში მონაწილეობის მიღება უფასოა, მეორე ტურში გასულები კი ოლიმპიადაში ასპარეზობისთვის 15 ლარს გადაიხდიან. რაც შეეხება მესამე და გადამწყვეტ ტურს, ის მოსწავლეებისთვის კვლავ უფასო იქნება.