ცნობილი გახდა, რომ სედი სინკი მარველის კინემატოგრაფიულ სამყაროს უერთდება. 22 წლის მსახიობს პოპულარობა Netflix-ის Stranger Things-ში შესრულებულმა როლმა მოუტანა. ცნობისთვის, სერიალის მეხუთე და ბოლო სეზონის გადაღება ახლახან დაასრულა.

Stranger Things-ის ვარსკვლავი Spider Man-ის მეოთხე ნაწილში მიიღებს მონაწილეობას. ფილმში ის თინეიჯერი შურისმაძიებლის როლს მოირგებს და ტომ ჰოლანდს გაუწევს პარტნიორობას. მართალია ჯერჯერობით არ არის ცნობილი კონკრეტულად ვის განასახიერებს სინკი, თუმცა Deadline-მა მიანიშნა, რომ მისი როლი მნიშვნელოვანი იქნება.

ადამიანი ობობას მესამე ნაწილში პიტერ პარკერი შემთხვევით მულტივერსს არღვევს და სხვადასხვა სამყაროდან ადამიან ობობებს, ტობი მაგუაირსა და ენდრიუ გარფილდს, ერთსა და იმავე რეალობაში აჩენს. Spider-Man: No Way Home-ის დასასრულს პერსონაჟის ჰოლანდის ვერსიამ რთული გადაწყვეტილება მიიღო. მას მოუწია წაეშალა თავისი იდენტობა სამყაროდან, რის გამოც მის შეყვარებულს, MJ-ს და საუკეთესო მეგობარს, ნედს, პიტერ პარკერის არსებობა დაავიწყდათ. 2021 წელს გამოსულმა ფილმმა Marvel Studios-ს და Sony Pictures-ს დიდი წარმატება მოუტანა.

ადამიანი ობობას მეოთხე ნაწილს კინორეჟისორი დესტინ დანიელ კრეტონი გადაიღებს. ის ჯონ უოტს ჩაანაცვლებს, რომელიც ფრენჩაიზის პირველ სამ ფილმს ხელმძღვანელობდა. Spider Man 4 კინოთეატრებში 2026 წლის 31 ივლისს გამოვა. ფილმის სიუჟეტზე ჯერჯერობით არაფერია ცნობილი.