დღეს, 19:00 საათზე ილიაუნის “ა” კორპუსში სტუდენტური მოძრაობა დაუმორჩილებლობის აქციას გამართავს. ამის შესახებ ინფორმაციას ილიაუნის სტუდენტური მოძრაობა ავრცელებს.ისინი წერენ, რომ არ ცნობენ არალეგიტიმური ხელისუფლების დრაკონულ კანონებს, თავიანთი სივრცის გამოყენებისთვის კი ნებართვა არ სჭირდებათ.

"10 მარტს, ილიაუნის "ა" კორპუსში გელოდებით დაუმორჩილებლობის აქციაზე!

ნათელი ხდება ის, რომ სისტემა კიდევ უფრო ამკაცრებს თვითგამოხატვის შეზღუდვებს. რეპრესიულმა რეჟიმმა საუნივერსიტეტო სივრცეშიც ასე ხისტი ფორმებით შემოაღწია. თეატრალურ უნივერსიტეტში შეჭრა და სტუდენტების იძულებით გამოყვანა ცხადყოფს, რომ სისტემა უკან არც ამგვარ ამორალურ ქმედებებზე დაიხევს. შეგახსენებთ, რომ ჩვენ არ ვცნობთ არალეგიტიმური ხელისუფლების დრაკონულ კანონებს, ჩვენი სივრცის გამოყენებისთვის კი არ გვჭირდება არანაირი ნებართვა.

უნივერსიტეტი ეკუთვნის სტუდენტებს, ყველა სახელმწიფო შენობა ეკუთვნის ხალხს. ჩვენი პროტესტი კიდევ უფრო ძლიერდება, რეპრესიები კი მხოლოდ და მხოლოდ გვაბრაზებს", — ნათქვამია ილიაუნის სტუდენტური მოძრაობის მიერ გავრცელებულ ინფორმაციაში.

შოთა რუსთაველის სახელობის თეატრალურ უნივერსიტეტში პოლიცია გუშინ, 9 მარტს სამჯერ მივიდა. მათ ჯერ სტუდენტები დააჯარიმეს, შემდეგ კი ტერიტორიის დატოვება მოსთხოვეს. ადვოკატმა გუჯა ავსაჯანიშვილის თქმით, სტუდენტების დაკავების საფრთხე იყო, ამიტომ მათ გადაწყვიტეს, რომ პროტესტი სხვა მიმართულებით გააძლიერონ.

პოლიცია სტუდენტებს ჯარიმებს ადმინისტრაციულ კოდექსში შეტანილი იმ ცვლილების საფუძველზე უწერდა, რომლითაც დახურულ სივრცეში მესაკუთრის ნებართვის გარეშე აქციის ჩატარება აიკრძალა. შეკრების კანონის მე-9 და მე-11 მუხლის დარღვევა 5000-ლარიან ჯარიმას ითვალისწინებს.

თეატრალურ უნივერსიტეტში სტუდენტთა ნაწილი, პროტესტის ნიშნად, 80 დღეზე მეტია ღამეს უნივერსიტეტის შენობაში ათევდა. ისინი ხელახალი არჩევნების დანიშვნას, აქციაზე უკანონოდ დაკავებული მოქალაქეების გათავისუფლებას და თეატრალური უნივერსიტეტის რექტორის გადადგომას ითხოვდნენ.

­