მალტის წარმომადგენელს წლევანდელ ევროვიზიაზე საკონკურსო სიმღერის სახელისა და ტექსტის შეცვლა მოუწევს. საქმე ისაა, რომ კომპოზიციას Kant — მალტურ ენაზე "სიმღერა" — ჰქვია, რაც ინგლისურ სლენგზე ისევე ჟღერს, როგორც სიტყვა "ვაგინა". ევროვიზიის წესები კი სიმღერის ტექსტში არანორმატიული ლექსიკის გამოყენებას კრძალავს.

კუნძულოვან ქვეყანას 2025 წლის ევროფესტივალზე 23 წლის მომღერალი მირიანა კონტე წარადგენს. იგი კონკურსის გულშემატკივრების ერთ-ერთ ფავორიტად მოიაზრება — ევროვიზიის ფანების აპლიკაციის რეიტინგში კონტე ამ დროისთვის მე-5 ადგილს იკავებს. თუმცა, მის საკონკურსო სიმღერაში რამდენჯერმე გამეორებულმა ფრაზამ "serving kant" მაინც გამოიწვია აზრთა სხვადასხვაობა. იდენტური ჟღერადობის ფრაზა ინგლისურენოვან ქვიარ თემში ხშირად გამოიყენება და ნიშნავს "გამბედაობის ჩვენებას".

ევროვიზიის ორგანიზატორის, ევროპის მაუწყებელთა კავშირის (EBU), ამ გადაწყვეტილებას თავად მირიანა კონტეც გამოეხმაურა.

"გაოცებული და იმედგაცრუებული ვარ, მით უფრო, რომ სიმღერის ტექსტის შესაცვლელად კვირაზე ნაკლები დრო გვაქვს, მაგრამ გპირდებით: შოუ გაგრძელდება — დივა არ დაეცემა", — დაწერა მომღერალმა სოციალურ ქსელში.

აღსანიშნავია, რომ EBU-ის გადაწყვეტილებას წინ უძღოდა ბრიტანეთის მაუწყებლის პროტესტი. BBC-ის რადიოს წამყვანმა სკოტ მილსმა განაცხადა, რომ მალტის საკონკურსო სიმღერას ეთერში ვერ გააჟღერებდნენ.

ფოტო: Corinne Cumming / EBU

წლევანდელ, რიგით 69-ე ევროვიზიის სიმღერის კონკურსს შვეიცარიის ქალაქი ბაზელი უმასპინძლებს. კონკურსის ნახევარფინალები 13 და 15 მაისს, ფინალი კი 17 მაისს გაიმართება.

ამ დრომდე უცნობია, ვინ წარადგენს საქართველოს 2025 წლის ევროვიზიაზე. მონაწილე ქვეყნების მაუწყებლებს საკონკურსო სიმღერების EBU-სთვის წარდგენა 10 მარტამდე შეუძლიათ.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...