ჯესი აიზენბერგი პოლონეთის მოქალაქე გახდა. ამერიკელ მსახიობსა და რეჟისორს პოლონეთის მოქალაქეობა მას შემდეგ მიენიჭა, რას მისმა ფილმმა A Real Pain კირან კალკინს ოსკარი მოუტანა.

"ეს ჩემთვის წარმოუდგენლად დიდი პატივია", — განაცხადა აიზენბერგმა ნიუ-იორკში გამართულ საზეიმო ცერემონიაზე, სადაც მას მოქალაქეობის დამადასტურებელი საბუთი პოლონეთის პრეზიდენტმა ანჯეი დუდამ პირადად გადასცა, — "ასეთ პატივს ცხოვრებაში მხოლოდ ერთხელ თუ დაიმსახურებ, მე კი ამას ორი ათწლეული ველოდი".

A Real Pain, რომლის რეჟისორი და სცენარისტი თავად აიზენბერგია, კინოვარსკვლავის ბიოგრაფიას ეფუძნება. ფილმში ორი ამერიკელი ბიძაშვილი (რომლებსაც კალკინი და აიზენბერგი ასახიერებენ) ჰოლოკოსტს გადარჩენილი ბებიის გარდაცვალების შემდეგ პოლონეთში მიემგზავრებიან მისთვის პატივის მისაგებად. აიზენბერგს იდეა მას შემდეგ დაებადა, რაც პოლონეთიდან აშშ-ში გადახვეწილი მისი პაპიდა გარდაიცვალა. ფილმის გადაღებები სწორედ პოლონეთში მიმდინარეობდა და მისმა რეჟისორმაც მაშინ გადაწყვიტა, ქვეყნის მოქალაქეობა ეთხოვა.

"როცა ამ ფილმს პოლონეთში ვიღებდით და ქუჩებში სიარულით ქვეყანას გავუშინაურდი, გავიაზრე, რომ ჩემი ოჯახი აქ ბევრად უფრო დიდხანს ცხოვრობდა, ვიდრე ნიუ-იორკში", — ამბობს აიზენბერგი, — "თუმცა, რა თქმა უნდა, ისტორია ტრაგიკულად განვითარდა, რასაც ჩემი ოჯახის ტრაგედიაც დაემატა — რომ პოლონეთთან კავშირი დავკარგეთ. ამან ძალიან დამამწუხრა და გადამაწყვეტინა, ეს კავშირი შეძლებისდაგვარად აღმედგინა".

მსახიობი იმედოვნებს, რომ მოქალაქეობის მიღება მისთვის "ამ მშვენიერ ქვეყანასთან" კავშირის აღდგენის მხოლოდ პირველი ნაბიჯია.

კირან კალკინი და ჯესი აიზენბერგი ფილმში A Real Pain (2024)

ფოტო: Searchlight Pictures

A Real Pain-ში მონაწილეობით კირან კალკინმა წლევანდელ ოსკარზე და ოქროს გლობუსზე მეორეხარისხოვანი როლის შემსრულებელი მსახიობი კაცის ნომინაციებში გაიმარჯვა. ამასთან, ამერიკული კინოაკადემიის დაჯილდოებაზე ფილმი საუკეთესო ორიგინალური სცენარის ნომინაციაშიც იყო წარდგენილი. სცენარისთვის აიზენბერგმა ბრიტანული კინოაკადემიის ჯილდოც (BAFTA) დაიმსახურა.

აიზენბერგმა პირველად შარშან გაამხილა, რომ პოლონეთის მოქალაქეობის მიღება ითხოვა. მსახიობმა, რომელიც სეკულარულ ებრაულ ოჯახში გაიზარდა, მაშინ ადგილობრივ გამოცემას განუცხადა, რომ "ებრაელებსა და პოლონელებს შორის ურთიერთობის გამოსწორებას" ისურვებდა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...