ბელარუსის ახალი ამბების სამთავრობო სააგენტო BELTA-ს ცნობით, ქვეყნის ავტორიტარმა მმართველმა, ალექსანდრ ლუკაშენკომ ბელარუს გეოლოგებს იშვიათი წიაღისეულის მოძებნისკენ მოუწოდა.

ლუკაშენკოს განცხადებით, გეოლოგიური დაზვერვა "აქტუალური თემაა", რომელიც ამ მომენტში მსოფლიოში ყველას აინტერესებს.

"ამბობენ, რომ ჩვენ გვაქვს იშვიათი მეტალები — უნდა ვეძებოთ დანარჩენებიც: ქიმია, ნავთობი, გაზი და ა.შ. მე შესაბამისი დავალება მივეცი შესაბამის მინისტრს". – თქვა ლუკაშენკომ.

შეხვედრაზე ლუკაშენკომ გეოლოგებიც "დატუქსა" და უსაყვედურა საკითხით ნაკლები დაინტერესების გამო.

"იშვიათ წიაღისეულზე მხოლოდ ტრამპი საუბრობს. თქვენ ამ თემაზე ჯერ არ გიფიქრიათ. მიწაში ისინი ბევრია. იქნებ, ჩვენ იმაზე არანაკლები გვაქვს, ვიდრე სხვებს? ბუნებრივი რესურსებისა და გარემოს დაცვის სამინისტროს თქვენთან ერთად დიდი შრომის გაწევა მოუწევს — უნდა ვთხაროთ და ვეძებოთ", — განაცხადა ბელარუსის პრეზიდენტმა.