"ქართული ოცნების გურიის დელეგატმა, ვასილ ჩიგოგიძემ გურიაში დიდთოვლობის შედეგად პრობლემების სალიკვიდაციო სამუშაოებში ჩართვისთვის მადლობა გადაუხადა ოცნების ხელისუფლებისა და მუნიციპალიტეტების წარმომადგენლებს და ადგილობრივ მოსახლეობას.

"მოგეხსენებათ, გურიაში ათი დღეა სტიქია გრძელდება. პირველივე დღეს პრემიერი რეგიონში ჩამობრძანდა, გაიხსნა შტაბი, რომლის მუშაობაშიც ჩართული იყო თავდაცვის სამინისტრო, შინაგან საქმეთა სამინისტრო, ინფრასტრუქტურის სამინისტრო, ჯანდაცვის სამინისტრო და დაიგეგმა ის ღონისძიებები, რომლებიც უნდა განხორციელებულიყო სტიქიის დროს. მადლობა მინდა გადავუხადო პრემიერ-მინისტრს, პრეზიდენტსა და მინისტრთა კაბინეტს.

ასევე, მადლობა მინდა გადავუხადო ადგილობრივ ხელისუფლებას, გუბერნატორს, მერებს, მერიის თანამშრომლებს, რომლებიც 24 საათის განმავლობაში სტიქიას ებრძოდნენ.

სტიქიის ზონაში მიმდინარე ინტენსიურ სამუშაოებში, ასევე, ჩართული იყო ახალგაზრდების ჯგუფი ბაკურიანიდან. ისინი სკუტერებით ახერხებდნენ მოსახლეობისთვის საკვებისა და მედიკამენტების მიტანას.

მადლობა გურიის მოსახლეობას სტიქიის დროს მიმდინარე ღონისძიებებში ჩართულობისთვის და თავშეკავებისთვის. მადლობა კოლეგებო, გვერდში დგომისთვის", — განაცხადა ქართული ოცნების გურიის დელეგატმა, ვასილ ჩიგოგიძემ.