გამოცემა POLITICO-ს ცნობით, კალინ გეორგესკუ, რუმინეთის პრეზიდენტობის პრორუსი კანდიდატი, რომელიც გაუქმებული საპრეზიდენტო არჩევნების პირველ ტურში გაიმარჯვა, რუმინეთის პოლიციამ დასაკითხად პროკურატურაში გადაიყვანა, როდესაც ის საპრეზიდენტო არჩევნებისთვის კანდიდატურის დარეგისტრირებას აპირებდა.

რუმინული გამოცემა Digi24 აცხადებს, რომ პროკურატურამ გეორგესკუს დაკავების ორდერი გამოსცა და მისი პირადი დაცვის სახლში ჩხრეკა ჩაატარა. უწყებას 27 ეჭვმიტანილი ჰყავს და მათ წინააღმდეგ გამოძიებას აწარმოებს რუმინეთის კონსტიტუციური წესრიგის დარღვევის, ფაშისტური ორგანიზაციის დაარსებისა და საარჩევნო დაფინანსების შესახებ ყალბი ინფორმაციის მიწოდების მიმართულებით.

ინფორმაციისთვის, კალინ გეორგესკუმ გასული წლის ნოემბერში გამართულ რუმინეთის საპრეზიდენტო არჩევნების პირველ ტურში გაიმარჯვა. მოგვიანებით რუმინეთის საკონსტიტუციო სასამართლომ არჩევნების შედეგები გააუქმა, მას შემდეგ რაც ქვეყნის უსაფრთხოების სამსახურებმა განაცხადეს, რომ არჩევნების შედეგებზე ზემოქმედებაში რუსეთის ფედერაცია იყო შემჩნეული.

ხელახალი საპრეზიდენტო არჩევნების პირველი ტური რუმინეთში 4 მაისს, ხოლო მეორე ტური 18 მაისს გაიმართება.