20-მდე კრიმინალური პოლიციის თანამშრომელმა ბელგრადში 4 NGO-ს ოფისში ჩაატარეს ჩხრეკა, რომელთაც USAID აფინანსებდა. საქმე ფულის გათეთრებისა და სამსახურებრივი მდგომარეობის ბოროტად გამოყენების ბრალდებით აღიძრა და მოკვლევას პროკურატურის ანტიკორუფციული სამსახური აწარმოებს.

Reuters იტყობინება, რომ პროკურორ ნენად სტეფანოვიჩის ცნობით, სერბეთის პოლიციამ ჩხრეკა ჩაატარა 4 არასამთავრობო ორგანიზაციის ოფისში აშშ-ის საერთაშორისო განვითარების სააგენტოს (USAID) გრანტების შესაძლო ბოროტად გამოყენების გამო.

მანამდე აშშ-ს პრეზიდენტის, დონალდ ტრამპის ადმინისტრაციამ იანვარში USAID-ის დაფინანსება 90 დღით გააყინა და მას შემდეგ სააგენტოს დახმარების აქტივობების შემცირება ცდილობდა.

დაზარალდა არასამთავრობო ორგანიზაციები, მედია საშუალებები და ჰუმანიტარული პროექტები მთელს მსოფლიოში, მათ შორის სამხრეთ და აღმოსავლეთ ევროპის ქვეყნებში.

სტეფანოვიჩის თქმით, პროკურორებმა მოიძიეს ინფორმაცია აშშ-სგან მას შემდეგ, რაც ტრამპმა, სახელმწიფო მდივანმა მარკო რუბიომ, მილიარდერმა ელონ მასკმა და სხვა ამერიკელმა ოფიციალურმა პირებმა განაცხადეს, რომ USAID-ის დაფინანსება გაყინეს.

"სერბეთის სპეციალური ანტიკორუფციული დეპარტამენტი... დაუკავშირდა აშშ-ს იუსტიციის დეპარტამენტს USAID-ის სახსრების ბოროტად გამოყენების, შესაძლო ფულის გათეთრებისა და აშშ-ს გადასახადების გადამხდელთა სახსრების ბოროტად გამოყენების შესახებ ინფორმაციისთვის სერბეთში", — თქვა მან ტელევიზიით.

სტეფანოვიჩმა დასძინა, რომ უზენაესმა სახელმწიფო პროკურატურამ გასცა ბრძანება ოთხი ორგანიზაციისგან USAID-თან დაკავშირებული ყველა დოკუმენტაციის ჩამორთმევისა და თანხების ხარჯვაზე პასუხისმგებელ პირებთან გასაუბრებაზე.

თავის მხრივ, სამოქალაქო ინიციატივების აღმასრულებელმა დირექტორმა, მაია სტოიანოვიჩმა განაცხადა, რომ დაახლოებით 20 დეტექტივმა ჩაატარა ჩხრეკა მისი ორგანიზაციის ოფისებში სასამართლოს ბრძანების წარდგენის გარეშე.