ქართულმა ოცნებამ "პროფესიული თეატრების შესახებ" კანონში ცვლილება დაარეგისტრირა. კანონპროექტის დეტალებზე პუბლიკა წერს.

კანონპროექტის მიხედვით, უქმდება თეატრის მართვის ორსაფეხურიანი მოდელი. თეატრს ერთპიროვნულად უხელმძღვანელებს თეატრის დირექტორი და გაუქმდება სამხატვრო ხელმძღვანელის, როგორც თეატრის საერთო ხელმძღვანელის თანამდებობა.

სამინისტროს მიერ დაფუძნებულ სახელმწიფო თეატრში, აჭარის და აფხაზეთის ავტონომიური რესპუბლიკების სახელმწიფო თეატრში თეატრის დირექტორს ნიშნავს კულტურის მინისტრი. მუნიციპალურ თეატრებში დირექტორს დანიშნავს მერი.

კანონი განსაზღვრავს მინისტრის მიერ თეატრის დირექტორის გათავისუფლების საფუძვლებსაც. ასეთ საფუძვლებს შორისაა – სარეკომენდაციო საბჭოს მიერ წარდგენილი რეკომენდაცია; თეატრის დასის ან სამხატვრო საბჭოს დასაბუთებული მოთხოვნა; მინისტრის ინიციატივა, რის შესახებაც დირექტორს ეცნობება ერთი თვით ადრე და ეძლევა ერთი თვის ხელფასი, ასევე მინისტრის ინიციატივა, რის შესახებაც დირექტორს ეცნობება 3 დღით ადრე და მიეცემა 2 თვის ხელფასი კომპენსაციად.

კანონი ამოქმედდება გამოქვეყნებისთანავე. მისი დაჩქარებული წესით განხილვა მოთხოვნილი არ არის, შესაბამისად, ოცნება მის მიღებას, სავარაუდოდ, თვე-ნახევარში შეძლებს.

კანონპროექტთა ავტორი ოცნების დეპუტატები არიან: არჩილ გორდულაძე, თორნიკე ჭეიშვილი, რატი იონათამიშვილი, დავით მათიკაშვილი, გურამ მაჭარაშვილი, ალექსანდრე ტაბატაძე, თენგიზ შარმანაშვილი, ალუდა ღუდუშაური, ვიქტორ ჯაფარიძე, სოზარ სუბარი, ნოდარ ტურძელაძე, ირმა ზავრადაშვილი, ლევან მაჭავარიანი, რამინა ბერაძე, ირაკლი კირცხალია, სალომე ჯინჯოლავა, თორნიკე ბერეკაშვილი, გენრიეტა წიწავა, მამუკა მდინარაძე.