რუსული სახელმწიფო საინფორმაციო სააგენტო რია ნოვოსტი სხვა პროსახელისუფლებო, რუსულ მედიასაშუალებებთან ერთად საფრანგეთში, ევრო 2016-ის მიმდინარეობისას მომხდარ ინციდენტში ფეხბურთის გულშემატკივრებს ადანაშაულებს.

როგორც რია ნოვოსტი წერს, ბრიტანელებმა რუსები "პროვოკაციაზე წამოაგეს, ფეხქვეშ გათელეს რუსული დროშა", რასაც შემდეგ მოჰყვა რუსი გულშემატკივრების დაპირისპირება.

თუმცა, აბსოლუტურად სხვა ინფორმაციას ავრცელებენ დასავლური მედიასაშუალებები, რომლის მიხედვითაც, რუსი გულშემატკივრები მარსელში, რუსეთ-ინგლისის მატჩის მიმდინარეობისას თავს დაესხნენ ბრიტანელ გულშემატკივრებს, დაპირისპირება გაგრძელდა სტადიონს გარეთაც, რის შედეგადაც ათეულობით ბრიტანელი დაშავდა, რამდენიმე მათგანი კი, მძიმედ.

UEFA-ს ეთიკისა და დისციპლინის კონტროლის დამოუკიდებელმა ორგანომ, რუსეთის ფეხბურთის გაერთიანების წინააღმდეგ დღეს, 14 ივნისს, სანქციის სახით, რუსეთის ეროვნულ ნაკრებს 2016-ის დასრულებამდე პირობითი დისკვალიფიკაცია განუსაზღვრა, გარდა ამისა, მასვე დაეკისრა ჯარიმა 150 000 ევროს ოდენობით.

უეფას გადაწყვეტილებით, თუკი მსგავსი სახის ინციდენტი ისევ განმეორდება სტადიონზე ევრო 2016-ის მატჩებზე, რუსეთის ნაკრები დატოვებს ჩემპიონატს.

ამავე დროს, საფრანგეთიდან რუსეთის ნაკრების 29 გულშემატკივარი ქვეყნიდან გააძევეს. ფრანგული პოლიციის ცნობით, არეულობებში: "150 კარგად გაწვრთნილი ხულიგანი" მონაწილეობდა.