თბილისის მერმა, კახა კალაძემ, თბილისის მუნიციპალიტეტის მთავრობის სხდომაზე თბილსერვის ჯგუფის ახალი მომსახურების — არასაყოფაცხოვრებო ნარჩენების გატანისთვის შექმნილი სპეციალური ვებგვერდის შესახებ ისაუბრა.

კალაძეს თქმით, ვებგვერდზე შესაძლებელია მონაცემების შევსება არასაყოფაცხოვრებო ნარჩენებზე, რომელიც კორპუსის ეზოს "წითელ ხაზებში" ან თბილისური ეზოს შემთხვევაში, მხოლოდ ეზოს ტერიტორიაზე უნდა განთავსდეს და თბილსერვის ჯგუფი 72 საათის განმავლობაში უზრუნველყოფს მის ადგილიდან გატანას. მომსახურების საფასური ერთ კუბურ მეტრამდე ნარჩენის გატანაზე 9 ლარია.

პრესრელიზში ასევე ახსნილია, რა იგულისხმება არასაყოფაცხოვრებო ნარჩენებში — სამშენებლო-სარემონტო ნარჩენები, ძველი ავეჯი, ნივთები, მწვანე ნარჩენი და ა.შ.

"თბილსერვის ჯგუფს აქვს ახალი მომსახურება მიზერულ ფასად, რაც ნარჩენების მართვის კუთხით დედაქალაქში არსებულ მდგომარეობას გააუმჯობესებს. თუ გჭირდებათ სამშენებლო-სარემონტო ნარჩენების, ძველი ავეჯის, ნივთების, ასევე, მწვანე ნარჩენის გატანა, შეგიძლიათ, ისარგებლოთ ახალი სერვისით. ამისთვის საჭიროა, დარეგისტრირდეთ ვებგვერდზე — www.tgservice.ge და შეავსოთ მონაცემები. არასაყოფაცხოვრებო ნარჩენს განათავსებთ კორპუსის ეზოს "წითელ ხაზებში" ან თბილისური ეზოს შემთხვევაში, მხოლოდ ეზოს ტერიტორიაზე და თბილსერვის ჯგუფი 72 საათის განმავლობაში უზრუნველყოფს ადგილიდან გატანას. ერთ კუბურ მეტრამდე ნარჩენის გატანის საფასური მხოლოდ 9 ლარია," — განაცხადა კახა კალაძემ.

კალაძემ ასევე აღნიშნა, რომ სერვისი არ არის მოგებაზე ორიენტირებული.

"მომსახურება მიზნად ისახავს, მოსახლეობას გავუმარტივოთ კონკრეტული სახის
ნარჩენების გატანა. თბილისში კონკრეტულ ადგილებში შეიძლება შეგხვდეთ
ნაგვის ურნებთან დალაგებული ავეჯი, საბურავები, რაც დიდ პრობლემას ქმნის.
ამიტომ გთავაზობთ ამ სერვისს, რაც უფრო კომფორტულია. ერთად
გავუფრთხილდეთ, ერთად მოვუაროთ ჩვენს ქალაქს. ჩვენ ყველანაირად ხელს
შეგიწყობთ და დაგეხმარებით," — განაცხადა კახა კალაძემ.

აღნიშნული მომსახურების მიღება შესაძლებელია რეგისტრაციის გარეშეც, TBC Pay აპარატების საშუალებით, შპს თბილსერვის ჯგუფის ცხელი ხაზის ოპერატორთან დაკავშირებით —0322619050