საერთაშორისო გამჭვირვალობა-საქართველო (TI) თბილისის საქალაქო სასამართლოში გიორგი ბაჩიაშვილის საქმის მიმდინარე განხილვას აკვირდება და შეფასებებს აქვეყნებს.

TI წერს, რომ აქამდე წარმოებული მრავალრიცხოვანი სისხლის სამართლის საქმეებისგან, რომლებიც ივანიშვილის რეჟიმის მორჩილი სამართალდამცავი და მართლმსაჯულების სისტემების გამოყენებით, უკანონო და დაუსაბუთებელი ბრალდების საფუძველზე წარმართულა, ალბათ არც ერთი არ ასახავს ივანიშვილის კერძო და პირად ფულად ინტერესს ასე მკაფიოდ და დაუფარავად, როგორც ბაჩიაშვილის საქმე.

გიორგი ბაჩიაშვილის მიმართ წარდგენილი ბრალდება მოკლებულია, როგორც იურიდიულ, ისე ფაქტობრივ საფუძვლებს - საქმეში არ არსებობს აშკარა, დამაჯერებელი და ერთმანეთთან შეთანხმებული საკმარისი მტკიცებულებები, — წერს

"საქმის მასალებში არ მოიპოვება დოკუმენტური მტკიცებულება, რომელიც დაადასტურებდა ივანიშვილის მიერ ბიტკოინების მაინინგში ვითომდაც განხორციელებული ინვესტიციის რეალურ არსებობას. მეტიც, ბაჩიაშვილის თქმით, დახურულ სასამართლო სხდომაზე დაკითხვის დროს ივანიშვილმა აღიარა კიდეც, რომ საინვესტიციო ხელშეკრულება ან მისი დამადასტურებელი რაიმე სხვა დოკუმენტური მტკიცებულება არ არსებობს.

მთავარი კითხვა, რომელიც ამ საქმეში ღიად რჩება, არის ის, წარმოადგენდა თუ არა ბაჩიაშვილის კომპანიისთვის ქართუ ბანკის მიერ გაცემული 5 მილიონი აშშ დოლარის სესხი ივანიშვილის "ინვესტიციას" ბიტკოინებში, რომლის სანაცვლოდაც ბაჩიაშვილი ვალდებული იყო ივანიშვილისთვის გადაეცა ამ თანხის პროპორციულად გამომუშავებული ბიტკოინები. შემდეგი გარემოებები მიუთითებს, რომ ეს ასე არ არის ან, ყოველ შემთხვევაში, საქმეში არ არსებობს მტკიცებულებათა ერთობლიობა, რომელიც "გონივრულ ეჭვს მიღმა" სტანდარტით დაარწმუნებდა "ობიექტურ დამკვირვებელს", რომ ივანიშვილს მართლაც ჰქონდა განხორციელებული ინვესტიცია”, — ნათქვამია TI-ს მიერ გავრცელებულ განცხადებაში.