14 თებერვალს მიუნხენის უსაფრთხოების კონფერენცია გაიხსნება და 16 თებერვლამდე გაგრძელდება. კონფერენციას მსოფლიოს არაერთი ლიდერი, მათ შორის უკრაინის პრეზიდენტი ვოლოდიმირ ზელენსკი და აშშ-ის ვიცე-პრეზიდენტი, ჯეიმს ვენსი დაესწრება.

საქართველოდან კონფერენციას მე-5 პრეზიდენტი სალომე ზურაბიშვილი და პარტია საქართველოსთვის ლიდერი, გიორგი გახარია დაესწრებიან. ქართული ოცნება კონფერენციაზე წარმოდგენილი არ იქნება — ისინი იქ არ მიუწვევიათ.

სალომე ზურაბიშვილი უმაღლესი დონის ორმხრივ შეხვედრებს გამართავს ევროპის ლიდერებთან და აშშ-ს დელეგაციასთან. მიუნხენში დაგეგმილია შეხვედრები ევროკავშირისა და სხვა საერთაშორისო ორგანიზაციების ხელმძღვანელებთანაც.

ზურაბიშვილი მონაწილეობას მიიღებს მიუნხენის კონფერენციის პანელურ დისკუსიებში: "საქართველო ყურადღების ცენტრში" და "რუსეთის ჰიბრიდული ტაქტიკა", სადაც ქვეყანაში არსებულ მდგომარეობასა და გამოწვევებზე ისაუბრებს. მე-5 პრეზიდენტი მიუნხენში ქართული დიასპორის წარმომადგენლებსაც შეხვდება.

სხვადასხვა პანელურ დისკუსიაში მონაწილეობას მიიღებს გიორგი გახარიაც — ასევე, გამართავს ორმხრივ შეხვედრები ამერიკის შეერთებული შტატების, დიდი ბრიტანეთის, ევროკავშირისა და ევროკავშირის წევრი სახელმწიფოების აღმასრულებელი და საკანონმდებლო ორგანოების ხელმძღვანელ პირებთან, ამერიკულ და ევროპულ წამყვან ანალიტიკურ ორგანიზაციებთან.

გიორგი გახარიას მთავარი გზავნილები საქართველოს პარტნიორებთან, უპირველეს ყოვლისა, შეეხება უკანონო პოლიტიკური პატიმრების დროულად გათავისუფლების მოთხოვნას და საქართველოს დროულ დაბრუნებას ნორმალური დემოკრატიული განვითარების გზაზე, რაც მხოლოდ და მხოლოდ შეცვლილ საარჩევნო გარემოში ახალი არჩევნების გზითაა შესაძლებელი.