ახალციხის რაიონული სასამართლოს მოსამართლემ, ანაიდ ოგანესიანმა ადიგენის საკრებულოდან გათავისუფლებული თანამშრომლის მიხეილ ბუცხრიკიძის სარჩელი უზრუნველყოფასთან დაკავშირებით, დააკმაყოფილა. მოსამართლის გადაწყვეტილებით, ადიგენის საკრებულოს აეკრძალა სასამართლო დავის დასრულებამდე, გათავისუფლებული თანამშრომლის, მიხეილ ბუცხრიკიძის ადგილზე სხვა პირის მუდმივად დანიშვნა.

მოსამართლის გადაწყვეტილების დეტალებზე სამხრეთის კარიბჭე წერს.

"რაც შეეხება სასამართლოს გადაწყვეტილებას, მან დროებითი განჩინების საფუძველზე დააკმაყოფილა ჩვენი მოთხოვნა და განმარტა, რომ სადავო სამართლებრივი ურთიერთობის წინასწარი მოწესრიგებისათვის, მნიშვნელოვანი ზიანისა და არსებული საფრთხის თავიდან ასაცილებლად, აუცილებელია ჩვენს მიერ მოთხოვნილი განჩინების მიღება, რის გამოც ჩვენი შუამდგომლობა დააკმაყოფილა და დავის დასრულებამდე, აუკრძალა უფლებამოსილ პირს, ადიგენის მუნიციპალიტეტის საკრებულოს, პირველადი სტრუქტურული ერთეულის აპარატის უფროსის თანამდებობაზე, სხვა პირის დანიშვნა, გარდა მოვალეობის შემსრულებლისა", — აცხადებს მიხეილ ბუცხრიკიძის იურისტი, ჯუნა სტეფნაძე.

ბუცხრიკიძის უფლებადამცველის განმარტებით, მათი მოთხოვნაა, განთავისუფლების ბრძანების ბათილად ცნობა და მიხეილ ბუცხრიკიძის თანამდებობაზე აღდგენა.

ადიგენის მუნიციპალიტეტის საკრებულოს აპარატის უფროსი მიხეილ ბუცხრიკიძე სამსახურიდან 2024 წლის 27 დეკემბერს გაათავისუფლეს. სამსახურიდან დათხოვნას ის 26 დეკემბერს სოციალურ ქსელში გაკეთებულ განცხადებას უკავშირებდა, სადაც წერდა, რომ ცალსახად ემიჯნება ოცნების ხელისუფლების მერ 28 ნოემბერს გაკეთებულ განცხადებას და გმობდა საქართველოს მოქალაქეების მშვიდობიანი პროტესტის ძალადობრივი ფორმით დარბევას.

საქმეზე სასამართლო პროცესი ახალციხის რაიონულ სასამართლოში ჯერ არ ჩანიშნულა.