საქართველოს უზენაესი სასამართლოს გადაწყვეტილებით, მორალური ზიანის ასანაზღაურებლად, გაზეთმა ასავალ-დასავალი თიბისი ბანკის ერთ-ერთი მფლობელს, მამუკა ხაზარაძეს 5 ათასი ლარი უნდა გადაუხადოს. გარდა ამისა, გაზეთს გავრცელებული ინფორმაციის საჯაროდ უარყოფა დაევალა. ამით, საქართველოს უზენაესმა სასამართლომ ნაწილობრივ გაიზიარა სააპელაციო სასამართლოს გადაწყვეტილება.

თიბისი ბანკში განმარტავენ, აღნიშნული თანხა მოხმარდება საქველმოქმედო მიზნებს.

"ასავალ-დასავალი გრძელვადიან, მიზანმიმართულ კამპანიას აწარმოებდა თიბისი ბანკისა და მამუკა ხაზარაძის წინააღმდეგ. გამოცემის თითქმის ყველა ნომერში ქვეყნდებოდა ღირსების შემლახველი სტატიები მამუკა ხაზარაძის მიმართ", - აღნიშნავენ თიბისი ბანკში.

სასამართლოში ბანკისა და მისი ერთ-ერთი მფლობელის სამართლებრივ უფლებებს ადვოკატი ქეთი ქვარცხავა იცავდა. მან დღეს გამართულ პრესკონფერენციაზე ასე შეაფასა სასამართლოს გადაწყვეტილება:

"ეს პრეცედენტი ცხადყოფს, რომ ადამიანის ღირსება, პატივი, ასევე კომპანიის საქმიანი რეპუტაცია დაცულია კანონის ძალით და სასამართლომ დაადასტურა, რომ ეს უფლებები ხელშეუვალია ჩვენს ქვეყანაში."

დავა საქართველოს სასამართლოებში სამ წელზე მეტი ხანი მიმდინარეობდა.