ბელარუსის საპრეზიდენტო არჩევნების გამარჯვებული ალექსანდრ ლუკაშენკოა. ცენტრალური საარჩევნო კომისიის ინფორმაციით, ლუკაშენკომ ხმების 86.28% მიიღო.

დასავლეთის ლიდერებისგან განსხვავებით, რომელთა დიდმა ნაწილმა არჩევნების შედეგები არ აღიარა, ყოფილი საბჭოთა ქვეყნების რამდენიმე ლიდერმა ლუკაშენკოს გამარჯვება მიულოცა.

"პატივცემულო ალექსანდრ გრიგორიევიჩ, გულითადად გილოცავთ ბელარუსის პრეზიდენტის პოსტზე ხელახალ არჩევას. არჩევნებზე დამაჯერებელი გამარჯვება მოწმობს თქვენს მაღალ პოლიტიკურ ავტორიტეტს და მოსახლეობის მხარდაჭერას სახელმწიფო კურსისადმი." — ასე გამოეხმაურა რუსეთის პრეზიდენტი ვლადიმირ პუტინი ბელორუსულ არჩევნებს.

პუტინმა ლუკაშენკოს მოსკოვსა და მინსკს შორის არსებული მეგობრობა შეახსენა, მისი გაძლიერება ისურვა და უახლოეს პერიოდში მოსკოვში "რუსულ მიწაზე" დაპატიჟა.

სატელეფონო ზარით ლუკაშენკოს გაპრეზიდენტება მიულოცა ყაზახეთის პრეზიდენტმა ყასიმ-ჟომართ თოყაევმა. ყაზახური მედიის ინფორმაციით, მათ ორი ქვეყნის თანამშრომლობის პერსპექტივებსა და საერთაშორისო ვითარებაზე ისაუბრეს.

ლუკაშენკოს ტელეფონით დაუკავშირდა აზერბაიჯანის პრეზიდენტი ილჰამ ალიევიც. მან ლუკაშენკოს გამარჯვება მიულოცა და წარმატებები უსურვა.

ალექსანდრ ლუკაშენკო დამოუკიდებელი ბელარუსის პირველი და ერთადერთი პრეზიდენტია. 1994 წლიდან დღემდე მან 7 საპრეზიდენტო არჩევნებზე გაიმარჯვა. ცესკოს შედეგებით, ლუკაშენკო ქვეყნის სათავეში 2030 წლამდე დარჩება.

ლუკაშენკას რეჟიმის მიერ დევნილი ოპოზიციის წარმომადგენლები ან ემიგრაციაში არიან, ან საპატიმროებში. ბელარუსში შეზღუდულია სიტყვის და გამოხატვის თავისუფლება და დამოუკიდებელი მედია.