პოლონეთის პრემიერმინისტრმა დონალდ ტუსკმა განაცხადა, რომ უნგრეთის პრემიერმინისტრის, ვიქტორ ორბანის მიერ რუსეთის წინააღმდეგ ევროკავშირის სანქციების დაბლოკვის შემთხვევაში, ორბანი ნათელს მოჰფენს ფაქტს, რომ ის "პუტინის გუნდში თამაშობს".

"თუ ვიქტორ ორბანი ომის გადამწყვეტ მომენტში მართლა დაბლოკავს ევროპულ სანქციებს, აბსოლუტურად ნათელი იქნება, რომ ამ დიდ თამაშში ევროპის უსაფრთხოებისა და მომავლისთვის, ის პუტინის გუნდში თამაშობს და არა ჩვენს გუნდში. ამ ფაქტის თანმდევი ყველა შედეგით". – წერს პოლონეთის პრემიერმინისტრი X-ზე.

ცნობისთვის, ორბანმა გუშინ განაცხადა, რომ უარს იტყვის სანქციების რეჟიმის გახანგრძლივებაზე, თუ ევროკავშირი არ მიაღწევს უკრაინისგან ცენტრალური ევროპის ქვეყნებში გაზის ტრანზიტის ნებართვას. ევროკავშირის სანქციები ყოველ ექვს თვეში ერთხელ გახანგრძლივდება და თუკი არ გაგრძელდება, მათი ვადა იანვრის ბოლოს ამოიწურება.

31 დეკემბერს უკრაინამ ევროპის ქვეყნებს რუსული გაზის მიწოდება შეუწყვიტა. აქამდე რუსული ბუნებრივი აირი ევროპას სწორედ უკრაინის ტერიტორიაზე არსებული გაზსადენებით მიეწოდებოდა.