აშშ-ის პრეზიდენტ დონალდ ტრამპის ბრძანების თანახმად, ამიერიდან მექსიკის ყურეს ამერიკის ყურე, ხოლო ჩრდილოეთ ამერიკის უმაღლეს მწვერვალ დენალს კვლავ ძველი სახელი, მაკკინლი დაუბრუნდება.

აშშ-ის შინაგან საქმეთა დეპარტამენტის რელიზში ვკითხულობთ, რომ ცვლილების მიზანი აშშ-ის მემკვიდრეობის დაცვა და მომავალი თაობის ამერიკელებისათვის ისტორიული ფაქტებისა და გმირების პატივისცემის გადაცემაა.

მექსიკის ყურე, რომელსაც ამიერიდან ამერიკის ყურე ეწოდება, აშშ-ის ისტორიისა და ეკონომიკისთვის ერთ-ერთი უმნიშვნელოვანესი გეოგრაფიული ობიექტია. რაც შეეხება მწვერვალ დენალს, ის ამ სახელს 2015 წლიდან, პრეზიდენტ ობამას ადმინისტრაციის გადაწყვეტილებით ატარებს, 1917-2015 წლებში კი ჩრდილოეთ ამერიკის უმაღლეს მწვერვალს სწორედ "ახალი" სახელით — მაკკინლით ვიცნობდით.

ტრამპმა მექსიკის ყურისათვის სახელის შეცვლის ინიციატივა საპრეზიდენტო ფიცის დადებისას, 20 იანვარს გამოაცხადა.