თანაინვესტირების ფონდის ყოფილი ხელმძღვანელი, გიორგი ბაჩიაშვილი სასამართლო რეფორმის პერიოდში ბიძინა ივანიშვილის სახლში მოსამართლეებისა და პროკურორების ინტენსიურ შეკრებებზე საუბრობს. ის აცხადებს, რომ სტუმართა შორის იყვნენ: ლევან მურუსიძე, მიხეილ ჩინჩალაძე და ირაკლი შოთაძე.

"მე იმის მომსწრე ვიყავი, ბიძინა ივანიშვილი ხელისუფლებაში იყო თუ არა, მოსამართლეები და პროკურორები მასთან რა სიხშირით დადიოდნენ. მე ზუსტად ვიცი, ივანიშვილს ყველა ამ დანაშაულებრივ დაჯგუფებასთან რა სიხშირისა და ინტენსივობის კომუნიკაცია ჰქონდა და მისი კონტროლის შესახებ. მე არცერთი ჩვეულებრივი ადამიანი არ მეგულება, ვის სახლშიც მოსამართლეები ყოველთვის იმ დროს იკრიბებიან, როცა სასამართლო რეფორმა ხორციელდება — იმ დროს, როცა ისეთი მნიშვნელოვანი საქმეები მიმდინარეობს, როგორიც იყო თუნდაც რუსთავი 2-ის საქმე [...]
ირაკლი შოთაძე სულ იქ იყო ხოლმე, ასევე მიხეილ ჩინჩალაძე. ლევან მურუსიძის სახეც მახსოვს — სულ დადიოდნენ ხოლმე. მე ივანიშვილთან კვირაში მინიმუმ 2-3-ჯერ დავდიოდი და აქედან, დაახლოებით, ნახევარი დრო ჩემამდე იყვნენ ან პროკურორები, ან მოსამართლეები— აცხადებს გიორგი ბაჩიაშვილმა TV პირველთან საუბარში.

ბაჩიაშვილის თქმით, 2019 წელს ბიძინა ივანიშვილი მას ტელეკომპანია რუსთავი 2-ის გადაფორმებას სთავაზობდა, რაზეც მისგან უარი მიიღო. ბაჩიაშვილი ასევე აცხადებს, რომ ე.წ. გლობალური ომის პარტიის ნარატივს მის თვალწინ თხზავდნენ.

"გლობალური ომის პარტიის ნარატივი ჩემ თვალწინ ითხზვებოდა და სანამ ამას ზაზა შათირიშვილი გამოაქვეყნებდა, მე შემომთავაზეს, რომ ზუსტად იგივე შინაარსის წერილები მე გამომექვეყნებინა, რაზეც უარი ვუთხარი, რადგან ივანიშვილის საქმეებში არსად არანაირი გლობალური ომის პარტიისა და გარე ძალის კვალი არ იმჩნეოდა" — ამბობს ბაჩიაშვილი.

დღეს საქალაქო სასამართლოში გიორგი ბაჩიაშვილის პროცესი გაიმართა. წარდგენილი ბრალდება 2017 წელს განხორციელებულ ქმედებას ეხება. კერძოდ, პროკურატურის ინფორმაციით, ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ მხოლოდ 536 900 აშშ დოლარი გადასცა, ხოლო დარჩენილი ინვესტორის კუთვნილი 8986 ოდენობის ბიტკოინი მართლსაწინააღმდეგოდ მიითვისა, რომლის ღირებულებაც მისი მართლსაწინააღმდეგოდ დაუფლების პერიოდში 43 მილიონამდე აშშ დოლარს შეადგენდა.

ბრალის დამტკიცების შემთხვევაში, გიორგი ბაჩიაშვილს 9-დან 12 წლამდე თავისუფლების აღკვეთა ემუქრება.