"ეხო კავკაზა"-ს მიერ გავრცელებული ინფორმაციით, ოკუპირებული აფხაზეთის ე.წ. უზენაესმა სასამართლომ, დაკავებულ კახა მურადოვს, "საქართველოს სასარგებლოდ ჯაშუშობისთვის" 15 წლით თავისუფლების აღკვეთა შეუფარდა.

როგორც გამოცემა "ეხო კავკაზა" იუწყება, მურადოვს თავისუფლების აღკვეთა მიესაჯა "სამშობლოს ღალატისა" და "ცეცხლსასროლი იარაღით უკანონო ვაჭრობის" ბრალდებით.

ამასთან, ოკუპირებული აფხაზეთის ე.წ. პროკურატურის ინფორმაციით, მურადოვი ბრალს არ აღიარებს.

კახა მურადოვის დაკავების შესახებ ინფორმაცია 2024 წლის 14 მაისს გავრცელდა. ოკუპირებული აფხაზეტის ე.წ. სახელმწიფო უსაფრთხოების სამსახურმა იგი "საქართველოს სასარგებლოდ ჯაშუშობის" ბრალდებით დააკავა.

მოგვიანებით, ოკუპირებული აფხაზეთის ე.წ. სახელმწიფო უსაფრთხოების სამსახურმა მურადოვის დაკავებასთან დაკავშირებით გაავრცელა განცხადება, სადაც აღნიშნულია, რომ "დაკავებული საქართველოს ტერიტორიული მთლიანობის აღდგენის ინტერესებიდან გამომდინარე აფხაზეთის მცხოვრებლების ფარულ სამუშაოებში ჩართვას ცდილობდა და "მხედრიონისა" და უკრაინაში მებრძოლი ქართული ლეგიონის წევრებთან კონტაქტი ჰქონდა".