უკრაინული მედიის მიერ გავრცელებული ინფორმაციით, ვოლოდიმირ ზელენსკი ფინეთის პრეზიდენტს, ალექსანდერ სტუბს დავოსის ეკონომიკური ფორუმის ფარგლებში გამართული შეხვედრისას შეხვდა.

უკრაინის პრეზიდენტმა და ალექსანდერ სტუბმა შეხვედრაზე უკრაინის თავდაცვის შესაძლებლობების გაძლიერების, უსაფრთხოების გარანტიებისა და რუსეთის წინააღმდეგ სანქციების გამკაცრების საკითხი განიხილეს.

„ჩვენ უკრაინის მხარდაჭერას გავაგრძელებთ. ეს ყველაფერი თქვენს დამოუკიდებლობას, სუვერენიტეტსა და ტერიტორიულ მთლიანობას ეხება. აღფრთოვანებული ვართ იმით, რასაც თქვენ აკეთებთ", — განაცხადა ფინეთის პრეზიდენტმა.

ცნობისთვის, გუშინ, ვოლოდიმირ ზელენსკი დავოსის ეკონომიკურ ფორუმზე სიტყვით გამოვიდა.

"ევროპამ საკუთარ თავზე დამოუკიდებლად უნდა იზრუნოს. ისე, რომ მსოფლიომ ამის იგნორირება ვერ შეძლოს. ევროპამ საკუთარი თავი ძლიერ გეოპოლიტიკურ მოთამაშედ უნდა ჩამოაყალიბოს. მნიშვნელოვან მოთამაშედ", — აღნიშნა ვოლოდიმირ ზელენსკიმ.