ნიუ-იორკ თაიმსის ცნობით, ტრამპის ადმინისტრაციამ მიგრანტების ინაუგურაციისშემდგომი რეიდები უკვე დაგეგმა და მომავალ კვირას განახორციელებს. ამერიკული მედიასაშუალება პირად წყაროებზე დაყრდნობით ამბობს, რომ ეს აშშ-ის ისტორიაში უდიდესი სადეპორტაციო ოპერაცია იქნება.

გეგმა, სახელწოდებით "ოპერაცია უსაფრთხოების დამცველი", სავარაუდოდ, მოქმედებას დონალდ ტრამპის ინაუგურაციის მომდევნო დღეს, 21 იანვარს დაიწყებს და 27 იანვრამდე გაგრძელდება.

აშშ-ის იმიგრაციისა და საბაჟო კონტროლის პოლიცია ქვეყნის სხვადასხვა ქალაქში დეპორტაციებს ტრადიციულად ახორციელებს, თუმცა ბოლო ხანებში, ტრამპის ინაუგურაციასთან დაკავშირებით, ოპერაციის გასაძლიერებლად დამატებითი ნაბიჯები გადაიდგა.

რეიდების თავდაპირველი ლოკაცია ჩიკაგო უნდა ყოფილიყო, თუმცა ვინაიდან ინფორმაცია გასაჯაროვდა, სასაზღვრო საკითხებში ტრამპის ნდობით აღჭურვილი ტომ ჰომანის თქმით, ის, შესაძლოა, შეიცვალოს.

რესპუბლიკელმა პრეზიდენტმა მასობრივი დეპორტაცია 2017 წელსაც დააანონსა, თუმცა, საბოლოოდ, 4 წელიწადში ქვეყნიდან დემოკრატ ბარაკ ობამაზე თითქმის 2-ჯერ ნაკლები იმიგრანტი გააძევა.

IPSOS-ის კვლევის თანახმად, ამჯერად ტრამპის პოლიტიკას დიდი მხარდაჭერა აქვს — ამერიკელთა 55% მასობრივი დეპორტაციის პოლიტიკას იწონებს.