სოციალური სამართლიანობის ცენტრის შეფასებით, 18 იანვარს, თემქაზე საპროტესტო აქციის მონაწილეები დაკავებისას სამართალდამცავებმა აშკარად არაპროპორციულად გამოიყენეს დაკავებულთა მიმართ ფიზიკური ძალა.

SJC მოუწოდებს შინაგან საქმეთა სამინისტროსა და საგამოძიებო ორგანოებს, რომ დაუყოვნებლივ გაათავისუფლონ დაკავებულები და ოპერატიულად გამოიძიონ პოლიციის მიერ ძალის გადამეტების და შეკრების მონაწილეების მიმართ ფიზიკური ძალადობის შემთხვევები.

"სოციალური სამართლიანობის ცენტრი ეხმაურება ნიღბების ტარებისთვის საპროტესტო მსვლელობის მონაწილეების ძალადობრივ დაკავებას. ამ რეპრესიული კანონის ინიციირებისას, იმთავითვე ცხადი იყო, რომ ის მოქალაქეების დასჯის, დაშინებისა და შეკრების უფლების შეზღუდვის ფორმალური საფუძველი გახდებოდა.

დაუმორჩილებლობის შესახებ მომიტინგეების ვერბალური შეძახილები არ გულისხმობს სამართალდამცავი ორგანოს წარმომადგენლის მიმართ წინააღმდეგობის გაწევას და წარმოადგენს სიმბოლურ აქტს, რომელიც დაცულია გამოხატვის თავისუფლებით. გარდა ამისა, სამართალდამცავებმა აშკარად არაპროპორციულად გამოიყენეს დაკავებულთა მიმართ ფიზიკური ძალა.

სულ უფრო და უფრო აშკარა ხდება, რომ “ქართული ოცნების” მმართველობამ რეპრესიული ბუნებას მიიღო და სამართალდამცავი ორგანოები სრულად პარტიული ინტერესებს დაექვემდებარა. ყოველდღიურ რეჟიმში მოქალაქეების მასობრივი დაკავება და მათზე ფიზიკური ძალადობა პროტესტის დასუსტებას და დასჯას ისახავს მიზნად და ავტორიტარული მმართველობის გაფორმების უმძიმეს ტენდენციას აჩვენებს.

მოვუწოდებთ შინაგან საქმეთა სამინისტროსა და საგამოძიებო ორგანოებს — დაუყოვნებლივ გაათავისუფლონ დაკავებული პირები და ოპერატიულად გამოიძიონ პოლიციის მიერ ძალის გადამეტების და შეკრების მონაწილეების მიმართ ფიზიკური ძალადობის შემთხვევები", — წერს SJC.

ცნობისათვის, გუშინ, 18 იანვარს, თეატრალური კომპანია ჰარაკის რეჟისორი გურამ მაცხონაშვილი, კამპანია ამომრჩევლების წევრები — მარიამ პაიჭაძე და სონა კალანდაძე და აქტივისტები: თამარა ჩუმაშვილი, რომან აკოპოვი და მარიამ გილაშვილი პოლიციამ თემქაზე, საპროტესტო აქციაზე ნიღბების ტარებისა და პოლიციის დაუმორჩილებლობისთვის დააკავა.

სოციალური სამართლიანობის ცენტრის ხელმძღვანელის, თამთა მიქელაძის თქმით, პოლიციის განყოფილებაში სამართალდამცავების მხრიდან ადგილი ჰქონდა ძალის გამოყენებას გურამ მაცხონაშვილის, მარიამ პაიჭაძისა და სონა კალანდაძის მიმართ.

გურამ მაცხონაშვილს განყოფილებაში კეფაში რამდენჯერმე ჩაარტყეს. მანამდე სონა კალანდაძეს აგინეს და თმით მოქაჩეს, თმით მოქაჩეს მარიამ პაიჭაძეც, — წერს თამთა მიქელაძე.

• თამთა მიქელაძე წერს, რომ თემქაზე დაკავებულ აქტივისტებს პოლიცია ფიზიკურად გაუსწორდა