ჩრდილოეთ კორეა უკრაინაში აგრესიის გარდა, რუსეთს ჯარისკაცებს აღლუმისთვისაც გაუგზავნის — ჩრდილოეთკორეელი სამხედროები 9 მაისის აღლუმზე გამოჩნდებიან — ამის შესახებ იაპონური NHK წერს.

რუსეთის თავდაცვის მინისტრი ანდრეი ბელოუსოვი ფხენიანს ნოემბერში ესტუმრა და სწორედ მაშინ განაცხადა მზადყოფნა, რომ მე-2 მსოფლიო ომში გამარჯვებისათვის მიძღვნილ რიგით მე-80 აღლუმში მონაწილეობა ჩრდილოეთკორეელმა სამხედროებმაც მიიღონ.

ბელოუსოვმა 15 იანვარს განაცხადა, რომ აღლუმზე 19 სხვადასხვა ქვეყნის ჯარისკაცები მოიწვიეს, 10 ქვეყანა კი წინადადებას დასთანხმდა — ამ 10 ქვეყნიდან 7 პოსტსაბჭოთა რესპუბლიკაა.

რუსეთმა და ჩრდილოეთ კორეამ 2022 წელს რუსეთის უკრაინაში შეჭრის შემდეგ სტრატეგიული პარტნიორობა მეტად გააძლიერეს. ვლადიმერ პუტინმა და კიმ ჩენ ინმა 2024 წლის ივნისში ურთიერთდაცვის ხელშეკრულებაც კი გააფორმეს.

აშშ და სამხრეთ კორეა დიქტატორულ სახელმწიფოს ბრალს სდებენ უკრაინაში მიმდინარე აგრესიაში 10000-ზე მეტი სამხედროს გაგზავნაში — კრემლი მოცემულ ინფორმაციას არც ადასტურებს და არც უარყოფს.