ჟურნალისტური ეთიკის ქარტია შეშფოთებულია, რომ პარტია ქართული ოცნება და მასთან აფილირებული პირები კრიტიკულ მედიაში მომუშავე ჟურნალისტების პროფესიულ დისკრედიტაციას და საზოგადოების ცალკეულ ჯგუფებში მათდამი სიძულვილის გაღვივებას ცდილობენ. ამის შესახებ ქარტიის გავრცელებულ განცხადებაშია საუბარი. ქარტიის ცნობით, მათ "ექსპრესნიუსის" დამფუძნებელმა და რედაქტორმა ირაკლი მანაგაძემ მიმართა.

"ექსპრესნიუსის" დამფუძნებლისა და რედაქტორის ირაკლი მანაგაძის განცხადებით, მას პარტია ქართული ოცნების სტრატეგიული კომუნიკაციების სამსახურის უფროსმა გიორგი გრძელიშვილმა სიტყვიერი შეურაცხყოფა მიაყენა და "ამოძირკვით" დაემუქრა. ირაკლი მანაგაძე შიშობს, რომ, გიორგი გრძელიშვილს, ძალოვან უწყებებში მისი კონტაქტებისა და გავლენების გათვალისწინებით, ამ მუქარის სისრულეში მოყვანა შეუძლია. ჟურნალისტი ქართული ოცნების პოლიტსაბჭოს მისი თანამშრომლის შეკავებისკენ მოუწოდებს." — წერია ჟურნალისტური ეთიკის ქარტიის მიერ გამოქვეყნებულ ინფორმაციაში.

ჟურნალისტური ეთიკის ქარტია შიშობს, რომ ამგვარი ქმედებები ჟურნალისტების უსაფრთხოების რისკებს ზრდის.

ჟურნალისტური ეთიკის ქარტია პარტია ქართული ოცნებას მოუწოდებს, ამ ინციდენტის გამოსაძიებლად შიდა მოკვლევა ჩაატაროს და შედეგები გაასაჯაროოს. ასევე უზრუნველყოს, რომ მისი თანამშრომლები დამოუკიდებელი მედიასაშუალებების საქმიანობაში არ ერეოდნენ, ჟურნალისტებს პატივისცემით ექცეოდნენ და კანონის დაცვით მოქმედებდნენ.

News.on.ge ქართული ოცნების სტრატეგიული კომუნიკაციების სამსახურის უფროსს გიორგი გრძელიშვილს დაუკავშირდა. გრძელიშვილი უარყოფს "ექსპრესნიუსის" დამფუძნებლის და რედაქტორის ირაკლი მანაგაძის ბრალდებას და აცხადებს, რომ არანაირ მუქარას მისი მხრიდან ადგილი არ ჰქონია.

"არანაირი მუქარა არ ყოფილა. შეურაცხყოფა მომაყენა და შეურაცხყოფაზე შესაბამისი პასუხი გავეცი", — აცხადებს გიორგი გრძელიშვილი.