ირაკლი დგებუაძისათვის სამსახურებრივი უფლებამოსილების დაუყოვნებლივ შეჩერებაზე საქართველოს ახალგაზრდა იურისტთა ასოციაციის მოთხოვნას საქართველოს ჟურნალისტური ეთიკის ქარტიაც უერთდება

15 იანვარს საიას თავმჯდომარემ, ნონა ქურდოვანიძემ ბათუმელები/ნეტგაზეთის დამფუძნებელ მზია ამაღლობელთან რუსთავის ციხეში ვიზიტის შემდეგ, არასათანადო მოპყრობაზე ისაუბრა, რაც ბათუმის პოლიციის უფროსმა, ირაკლი დგებუაძემ დაკავებული ჟურნალისტის წინააღმდეგ გამოიყენა. ქურდოვანიძის თქმით, ირაკლი დგებუაძემ ამაღლობელს სახეში შეაფურთხა, ასევე, მისი ბრძანების შესაბამისად, მზია ამაღლობელს არ ეძლეოდა წყლის დალევისა და საპირფარეშოთი სარგებლობის შესაძლებლობა.

საიამ სპეციალურ საგამოძებო სამსახურს მოუწოდა, დროულად გამოიძიოს მზია ამაღლობელის მიმართ დამამცირებელი მოპყრობის ფაქტი, დაუყოვნებლივ შეუჩერდეს სამსახურებრივი უფლებამოსილება ბათუმის პოლიციის უფროსს, ირაკლი დგებუაძეს.

მზია ამაღლობელი ბათუმში აქციაზე 12 იანვარს დააკავეს. მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს, რაც 4-დან 7 წლამდე პატიმრობას ითვალისწინებს.

ამ აქციაზე მზია ამაღლობელი ორჯერ დააკავეს – თავდაპირველად 11 იანვრის ღამეს, კედელზე პლაკატის გაკვრის გამო. მოგვიანებით ის გაათავისუფლეს. გათავისუფლებიდან მალევე, აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს 2 სხვა პირთან ერთად.

13 იანვარს ბათუმელებმა/ნეტგაზეთმა გაავრცელა ვიდეო და ინფორმაცია, რომ მათ დირექტორს, მზია ამაღლობელს ბათუმის პოლიციის უფროსი ირაკლი დგებუაძე აგინებს და ვიდეოში ისმის მისი სიტყვები: "სისხლით… ბო*იშვილი ვიყო, სისხლით დავიჭერ, ამას მოვუ**ნავ დედის მუ*ელს".

14 იანვარს მზია ამაღლობელს ბათუმის საქალაქო სასამართლოს მოსამართლემ, ნინო სახელაშვილმა აღკვეთის ღონისძიების სახით პატიმრობა შეუფარდა. წინასასამართლო სხდომის თარიღად 4 მარტი, 11:00 საათი განისაზღვრა.