"პატივცემულო მოსამართლევ, გთხოვთ, შეხედეთ ბრალდებულებს, ჯერ არ შეგიხედავთ. აბა, შეხედეთ ონისე ცხადაძეს, ჰგვანან იმ მონსტრებს, როგორადაც მათ სახელმწიფო ბრალდება გვისახავს?", — ამ სიტყვებით მიმართა იუმორისტ ონისე ცხადაძის ადვოკატმა, მოსამართლე ქეთევან ჯაჭვაძეს თბილისის საქალაქო სასამართლოში მიმდინარე პროცესზე, სადაც ონისე ცხადაძის საქმესთან ერთად 10 პირის საქმე განიხილება, რომლებიც პროევროპულ აქციებზე მონაწილეობისთვის დააკავეს.

"პატივცემულო მოსამართლევ, გთხოვთ, შეხედეთ ბრალდებულებს, ჯერ არ შეგიხედავთ. აბა, შეხედეთ ონისე ცხადაძეს, ჰგვანან იმ მონსტრებს, როგორადაც მათ სახელმწიფო ბრალდება გვისახავს? გთხოვთ, ამ შემთხვევაში არა თქვენს წრეში გაბატონებულ მოსაზრებას ან სტერეოტიპს დაეყრდნოთ, არამედ დაეყრდენით მხოლოდ მტკიცებულებებს, საქმის მასალებს და თქვენს შინაგან რწმენას", — მიმართა ადვოკატმა შოთა თუთბერიძემ.

ადვოკატმა სასამართლოს ონისე ცხადაძის აღკვეთის ღონისძიების გარეშე დატოვების შუამდგომლობით მიმართა და გირაო შესთავაზა, რომლის ოდენობის განსაზღვრაც სასამართლოს მიანდო. მან სასამართლოს გაცილებით მძიმე დანაშაულში ბრალდებულების — სპორტსმენ ზვიად ზვიადაურისა და ყოფილი გენერალური პროკურორის, ოთარ ფარცხალაძის მიმართ გირაოს გამოყენების პრაქტიკა შეახსენა. მისი თქმით, თუ იმხელა გავლენების მქონე პირი 5 ათასლარიანი გირაოთი გამოუშვეს, მით უმეტეს ონისე ცხადაძე არ წარმოადგენდა საფრთხეს.