თბილისის საქალაქო სასამართლოში დღეს უნდა გაიმართოს ე.წ. ციანიდის საქმის დასკვნითი სხდომა, სადაც მხარეები საბოლოო სიტყვით უნდა წარსდგნენ. ამის შემდეგ მოსამართლე განაჩენის გამოსატანად გავა, რის შემდეგაც გამოაცხადებს გადაწყვეტილებას მკვლელობის მომზადებაში ბრალდებული დეკანოზ გიორგი მამალაძის ბრალეულობის შესახებ,

ადვოკატები დარწმუნებულნი არიან, რომ თუ სასამართლო ვინმეს გავლენის ქვეშ არ მოექცევა, გიორგი მამალაძე გამართლდება.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იმყოფებოდა, სადაც პატრიარქი მკურნალობდა.

გიორგი მამალაძე წარდგენილ ბრალდებას არ აღიარებს, პროკურატურა კი საპირისპიროს ამტკიცებს. მათ გაავრცელეს ფარული ვიდეოჩანაწერები, რაც, საგამოძიებო უწყების ცნობით, მამალაძის საქმეში ერთ-ერთი მთავარი მტკიცებულებაა.