ბოლნისის ცენტრალურ კლინიკაში ამ დროისათვის ექიმების მეთვალყურეობის ქვეშ 2 პირი რჩება, დანარჩენები კი უკვე გაწერეს. ექიმის ინფორმაციით, გუშინ საღამოს, დაპირისპირების შემდეგ, საავადმყოფოში 10 პირი შეიყვანეს. ინფორმაციას მთავარი ავრცელებს.

"შემოიყვანეს 10 პაციენტი, აქედან ორი მკურნალობს ჩვენს კლინიკაში, 8 გაწერა. მიეცათ რეკომენდაცია ამბულატორიული მკურნალობის ბინაზე.

ერთი გადაყვანილია პალატაში, ნევროლოგიის განყოფილებაში, მეორე ჯერჯერობით იმყოფება დაკვირვების დარბაზში და ცოტა ხანში, ალბათ გადავიყვანთ ინტენსიურში. მძიმე დაზიანებები აქვთ და ამიტომ რჩებიან სამკურნალოდ," — განაცხადა ოთარ ქებაძემ, ბოლნისის "ემერჯენსის" ხელმძღვანელმა.

შეგახსენებთ, გასულ ღამეს სოფელ ნახიდურში, ცენტრალურ საავტომობილო გზაზე მომხდარ ავტოსაგზაო შემთხვევას ორი მოზარდი ემსხვერპლა, რის შემდეგაც ადგილზე ადგილობრივი მოსახლეობა შეიკრიბა და ვითარება დაიძაბა.

შსს-ს ინფორმაციით, დაპირისპირება მოხდა როგორც ადგილზე შეკრებილ მოქალაქეებს, ასევე, მოქალაქეებსა და საზოგადოებრივი წესრიგის დაცვის მიზნით ადგილზე მყოფ სამართალდამცველებს შორის.

შეკრებილებმა გადააბრუნეს როგორც შეჯახებაში მონაწილე ავტოსატრანსპორტო საშუალება, ასევე, სასწრაფო - სამედიცინო დახმარების ბრიგადის ავტომობილი.

ასევე, მათ დააზიანეს და ფანჯრები ჩაუმსხვრიეს ადგილზე მყოფი სხვა მოქალაქეების ავტომობილებს. შეკრებილი პირები, ავტოსაგზაო შემთხვევაში მონაწილე სატრანსპორტო საშუალების მგზავრებს გადაადგილების შესაძლებლობას არ აძლევდნენ, ასევე, სამართალდამცველებს საგამოძიებო მოქმედებების ჩატარებაში უშლიდნენ ხელს, ამასთან, სასწრაფო სამედიცინო დახმარების ექიმებს მუშაობის საშუალებას არ აძლევდნენ.

სიტუაციის დეესკალაციის მიზნით, შემთხვევის ადგილზე მყისიერად გამოცხადდნენ შინაგან საქმეთა სამინისტროს სხვადასხვა დანაყოფის წარმომადგენლები, მათ შორის საპატრულო, კრიმინალური და განსაკუთრებულ დავალებათა დეპარტამენტების თანამშრომლები.

დაპირისპირების შედეგად, სხვადასხვა სახის დაზიანება მიიღო შინაგან საქმეთა სამინისტროს რამდენიმე თანამშრომელმა და დაშავდა 8 მოქალაქე, რომლებსაც შესაბამისი სამედიცინო დახმარება გაეწიათ. ნაწილი მათგანი ამ დრომდე რჩება სამედიცინო დაწესებულებებში, — ნათქვამია შსს-ს მიერ გავრცელებულ ინფორმაციაში.