ბორჯომ-ხარაგაულის ეროვნულ პარკში, აბასთუმნის მიმდებარედ, შერეული ტყის მასივში გაჩენილი ხანძრის სალიკვიდაციო სამუშაოები დილიდან განახლდა.

შინაგან საქმეთა სამინისტროს ინფორმაციით, მთელი ღამის განმავლობაში ხანძრის კერებთან იმყოფებოდა ათეულობით ხანძარსაწინააღმდეგო ტექნიკა და ცოცხალი ძალა, გამთენიისას კი ხანძრის ქრობის პროცესში ჩაერთო ავიაცია.

უწყების თქმით, დღეს თურქეთის რესპუბლიკა ვერტმფრენსა და სახანძრო-სამაშველო თვითმფრინავს გამოყოფს.

აბასთუმნის ტყეში ხანძარი 29 აგვისტოს გაჩნდა. შსს-ს ცნობით, ხანძრის ქრობის პროცესში ჩართულია ათასზე მეტი თანამშრომელი, გაიჭრა ხუთ კილომეტრამდე გზა და ხანძრის კერებთან შეყვანილია ათეულობით ხანძარსაწინააღმდეგო ტექნიკა.

როგორც უწყებამ თქვა, ცეცხლის ლოკალიზების სამუშაოებში ჩართული იყო შსს-ს სასაზღვრო პოლიციის, ასევე, კომპანია თუშეთის ვერტმფრენები. ასევე, გუშინ დღის მეორე ნახევარში ხანძრის ქრობის პროცესში ჩაერთო უკრაინული თვითმფრინავი და აზერბაიჯანისა და თურქეთის ვერტმფრენები.