რუსმა ჩოგბურთელმა, მარია შარაპოვამ ამერიკის ღია ჩემპიონატზე (US Open) მსოფლიოს მეორე ჩოგანი, რუმინელი სიმონა ჰალეპი დაამარცხა. 15-თვიანი დისკვალიფიკაციის შემდეგ შარაპოვასთვის ეს დიდი სლემის ტურნირის პირველი შეხვედრაა.

ჰალეპთან შეხვედრა, თითქმის, სამი საათი გაგრძელდა. რუსმა ჩოგბურთელმა მატჩი ანგარიშით 6:4, 4:6, 6:3 დაასრულა.

2016 წლის ივნისში ჩოგბურთის საერთაშორისო ფედერაციამ რუს სპორტსმენს ორწლიანი დისკვალიფიკაცია მისცა, შემდგომში ვადამ 15 თვემდე ჩამოიწია.

მოედანზე დაბრუნების შემდეგ შარაპოვამ 211-ე ადგილი დაიკავა, რითაც wild card (სპეციალური მოწვევა) მიიღო სამ ტურნირზე - შტუტგარდტში, მადრიდსა და რომში.

ამ წლის მაისში ის საფრანგეთის ტურნირზე, როლან გაროსზე არ დაუშვეს, რადგან ორგანიზატორებმა მას wild card არ მისცეს. ივნისში კი შარაპოვამ ტრავმის გამო უიმბლდონის ტურნირის საკვალიფიკაციო მატჩი ვერ ჩაატარა.