მარია შარაპოვას დისკვალიფიკაციის ვადა 2 წლიდან 15 თვემდე შეუმცირეს. ამის შესახებ abcNews წერს. რუს ჩოგბურთელს აპრილის თვეში შეეძლება კორტებზე დაბრუნება და დიდ სლემზე თამაში.

საარბიტრაჟო სასამართლომ მიიჩნია, რომ 15-თვიანი სანქცია შესაფერისია. თავდაპირველად, აკრძალვა ძალაში შევიდა 26 იანვარს და 2018 წლის 25 იანვრამდე უნდა გაგრძელებულიყო, მაგრამ ახლა თითქმის 1 წლით ადრე დასრულდება.

ქალთა საჩოგბურთო ასოციაციის აღმასრულებელი დირექტორის თქმით, მარია კორტებზე დაბრუნებას 2017 წელს შეძლებს.

7 მარტს რუსეთის ყველაზე ცნობილმა სპორტსმენმა, ჩოგბურთელმა მარია შარაპოვამ აღიარა, რომ დოპინგ ტესტი ვერ გაიარა.

მისი თქმით, ის 2006 წლიდან იღებდა მელდონიუმს, თუმცა მსოფლიო ანტი-დოპინგ სააგენტომ დისკვალიფიკაცია ამა წლის იანვარში მისცა.

მელდონიუმი იშეემის საწინააღმდეგო მედიკამენტია, რომელიც გარდა დანიშნულებისამებრ მოქმედებისა, ხშირად პაციენტის გამძლეობას ამაღლებს. ამ გვერდითი მოვლენის გამო წამალს აქტიურად მოიხმარდნენ სპორტსმენები. 2016 წლის პირველი იანვრიდან მსოფლიო ანტი-დოპინგ სააგენტომ მელდონიუმი აკრძალულ პრეპარატთა სიაში შეიტანა.