დღეს საქართველოს პარლამენტმა ლევან მაჭავარიანის, არჩილ გორდულაძის, სალომე ჯინჯოლავას, თორნიკე ბერეკაშვილის, თორნიკე ჭეიშვილის, პაატა სალიას, გიორგი გეგუჩიას და ირაკლი ჭეიშვილის სადეპუტატო უფლებამოსილება ცნო.

შეგახსენებთ, რომ პაატა სალია ტელეკომპანია რუსთავი 2-ის ყოფილი დირექტორი და ქიბარ ხალვაშის ადვოკატია. როგორც რადიო თავისუფლება წერს, ის ამ დრომდე შპს სამაუწყებლო კომპანია რუსთავი 2-ის დირექტორია. ამ შპს-ს ეკუთვნის ტელეკომპანია რუსთავი 2-ის 10%-იანი წილი. მისი თქმით, ამის მიუხედავად, არ გაჩნდება კითხვა ტელეკომპანიის სარედაქციო პოლიტიკის ქართული ოცნების“ მიმართ მიკერძოებასთან დაკავშირებით.

მათ პარლამენტში ქართული ოცნების მანდატები მას შემდეგ მიიღეს, რაც მმართველი პარტიის 8 წევს უფლებამოსილება შეუწყდა.

პარლამენტმა დღეს ირაკლი კობახიძეს, მაკა ბოჭორიშვილს, ანრი ოხანაშვილს, დავით სონღულაშვილს, მარიამ ქვრივიშვილს, ბიძინა ივანიშვილს, ირაკლი ღარიბაშვილს და მიხეილ ყაველაშვილს პარლამენტის წევრის უფლებამოსილება ვადამდე შეუწყვიტა.

ხუთმა მათგანმა პარლამენტიდან მთავრობაში გადაინაცვლა, ერთი პრეზიდენტობის კანდიდატია, ორმა მათგანმა კი უფლებამოსილების ვადამდე შეწყვეტის თხოვნით პარლამენტს პირადი განცხადებით მიმართა.

საკანონმდებლოდან აღმასრულებელ ხელისუფლებაში გადაინაცვლეს ირაკლი კობახიძემ, მაკა ბოჭორიშვილმა, ანრი ოხანაშვილმა, დავით სონღულაშვილმა და მარიამ ქვრივიშვილმა. პრეზიდენტობის კანდიდატია მიხეილ ყაველაშვილი.

პირადი განცხადების საფუძველზე უფლებამოსილება ვადამდე შეუწყდათ ბიძინა ივანიშვილსა და ირაკლი ღარიბაშვილს.