დეკანოზი შალვა კეკელია 10 დეკემბერს გავრცელებულ განცხადებაში დემონსტრანტების მიერ კუბოს დაწვის ფაქტს ეხმაურება, რომელზეც მისი თქმით, მაცხოვარი იყო გამოსახული. დეკანოზი ამბობს, რომ მომხდარი "ნებსით თუ უნებლიეთ ეშმაკის მსახურებაა".

"გვინდა გამოვეხმაუროთ რუსთაველზე, აქციის მიმდინარეობისას, მომხდარ შემზარავ ფაქტს. ახალგაზრდებმა გამოიტანეს და დაწვეს კუბო, რომელზეც გამოხატული იყო უფალი ჩვენი იესო ქრისტე.

მართლმადიდებელი ეკლესია ემზადება ქრისტესშობის დღესასწაულისთვის, რაც გულისხმობს ჩვენი გულების განწმენდას, რათა მასში იშვას უფალი. მომხდარი კი არის საშინელი ღვთისგმობა და ნებსით თუ უნებლიეთ ეშმაკის მსახურება. ასე იქცეოდნენ ეკლესიის მტრები და ღვთისმგმობლები ხატმებრძოლეობის და კომუნისტების პერიოდში, ინგრეოდა ტაძრები და წვავდნენ ხატებს. ახალგაზრდებს ვთხოვთ შეინანონ ეს გმობა და მიუხედავად დაძაბული ვითარებისა არ ჩამოშორდნენ მაცხოვარს მსგავსი მიუღებელი ქმედებებით", — წერია თბილისის ვაკის მაცხოვრის ფერიცვალების სახელობის ტაძრის გავრცელებულ განცხადებაში.

შეგახსენებთ, 9 დეკემბერს, რუსთაველის გამზირზე გამართულ აქციაზე, მომიტინგეებმა პარლამენტთან დადგმულ ნაძვის ხესთან კუბო მიიტანეს, სადაც ბიძინა ივანიშვილის გამოსახულებით ფიტული მოათავსეს, შემდგომ კი — დაწვეს.

სამთავრობო ტელეკომპანია "იმედმა" საკუთარ გვერდზე 10 დეკემბერს აქციის მონაწილეების მიერ კუბას დაწვის ვიდეო გამოაქვეყნა, რომელსაც დააწერა, რომ "მომიტინგეებმა პარლამენტის წინ დაწვეს კუბო, რომელზეც იესო ქრისტე იყო გამოსახული."