ექიმ გიორგი ახობაძეს, რომელიც აცხადებს, რომ ნარკოტიკი ჩაუდეს, წინასწარი პატიმრობა შეუფარდეს.

გადაწყვეტილება მოსამართლე ლელა მარიდაშვილმა მიიღო. მან გაითვალისწინა პროკურორის მტკიცება, რომ არსებობს საფრთხე დაკავებულის მხრიდან ახალი დანაშაულის ჩადენის, მტკიცებულებების განადგურებისა და მიმალვის.

"დაკავების შემდეგ, არც ადვოკატთან და არც ახლობლებთან კომუნიკაციის საშუალება არ მქონია, ვერ შევატყობინე, რომ დაკავებული ვიყავი. პატრულმა რომ გამაჩერა, ძალის გამოყენებით მოხდა პატრულის მანქანის ე.წ. კაპოტზე სახით დაწვენა. პატრულის თანამშრომელმა მარცხენა ჯიბეში მოათავსა ნივთიერება", — თქვა დაკავებულმა ექიმმა, გიორგი ახობაძემ სასამართლო პროცესზე

ის პოლიციამ 8 დეკემბერს დააკავა. გამოძიება სისხლის სამართლის კოდექსის 260-ე მუხლით მიმდინარეობს, რაც ნარკოტიკული საშუალების უკანონო დამზადება, წარმოება, შეძენა, შენახვა, გადაზიდვას ან გადაგზავნას გულისხმობს.

პროტესტის ნიშნად ახობაძემ მშრალი შიმშილობა გამოაცხადა, ის ამბობს, რომ ნარკოტიკული ნივთიერება მას პოლიციამ ჩაუდო.

"თვითონ როგორც ამბობს, დაკავებისთანავე იგრძნო, რომ მარცხენა ჯიბეში ხელით ჩაუდეს რაღაც სახის ნივთიერება, რომელიც მერე რამდენიმე მეტრში რომ გადაიყვანეს, ააწევინეს ხელები, შემდეგ დაიწყეს ვითომ ოფიციალურ ჩხრეკა და ჩხრეკის დროს თითქოს მისი ნარკოტიკი, რომელიც რეალურად ჩაუდე, როგორც თვითონ მითხრა, ამოიღეს ჯიბიდან. ამ დროს., როგორც ახსოვს, არანაირი ვიდეო გადაღება არ მიმდინარეობდა. […] დიღმის იზოლატორშია, მე დილით მოვინახულე, შესაბამისად ამის ფონზე მითხრა, რომ დიდი პროტესტის გრძნობა აქვს, ამიტომ აცხადებს მშრალ შიმშილობას, შესაბამისად არა თუ საჭმელს, წყალსაც არ იღებს", — განაცხადა ადვოკატმა.