ქართულ სახლის საბჭოში გაწევრიანებული 14 ორგანიზაცია ესტონეთში საქართველოს საელჩოსთან და ელჩ ზურაბ ხამაშურიძესთან თანამშრომლობას წყვეტს, — ამის შესახებ ქართული სახლის საბჭოს მიერ გავრცელებულ განცხადებიდან ხდება ცნობილი.

ორგანიზაციის წევრები წერენ, რომ მათ მიმართეს ესტონეთში საქართველოს საგანგებო და სრულუფლებიან ელჩს, ზურაბ ხამაშურიძეს და მოუწოდეს, დაეფიქსირებინა საკუთარი პოზიცია საქართველოში მიმდინარე მოვლენებთან დაკავშირებით და გამიჯვნოდა ე.წ. მთავრობის ანტიდასავლურ კურსს, მაგრამ მისგან პასუხი არ მიუღიათ. სწორედ ეს გახდა იმის მიზეზი, რომ ესტონეთის ქართული დიასპორის ნაწილმა საელჩოსთან თანამშრომლობა შეწყვიტა.

"ქართულ კულტურულ ორგანიზაციათა გაერთიანება ქართული სახლის საბჭო შედგება ქართულ სახლში გაწევრიანებული 14 ორგანიზაციის ხელმძღვანელისგან და მოიცავს ესტონეთში მუდმივად მცხოვრები ქართველების უმრავლესობას. ვეყრდნობით რა საბჭოს აბსოლუტური უმრავლესობის გადაწყვეტილებას, ვწყვეტთ ყოველგვარ თანამშრომლობას ესტონეთის რესპუბლიკაში საქართველოს საელჩოსთან.

მრავალი წელია, „ქართული სახლი“ აქტიურად თანამშრომლობს საქართველოს საელჩოსთან, როგორც კულტურულ-საგანმანათლებლო, ასევე არაერთი სხვა მიმართულებით. უაღრესად მნიშვნელოვანი იყო ქართული სახლის წვლილი კოვიდის დროს ესტონეთში მყოფი საქართველოს მოქალაქეების მხარდაჭერაში, რაც, 6 თვის განმავლობაში, 30-ზე მეტი ადამიანის დაბინავებაში, საკვებით თუ პირველადი მოხმარების ნივთებით უზრუნველყოფაში გამოიხატებოდა. საქართველოს საელჩოსთან ერთად, არაერთი ღონისძიება გვაქვს ჩატარებული და დაფინანსებული. „ქართული სახლი“ ყოველთვის მზად იყო, გვერდით დასდგომოდა ჩვენი სამშობლოს ოფიციალური წარმომადგენლობას ესტონეთში, მიუხედავად იმისა, თუ ვინ იქნებოდა საელჩოს ხელმძღვანელი. საქართველოს დამოუკიდებლობის აღდგენის დღიდან, ჩვენი ურთიერთობა საელჩოსთან იყო ღია, მეგობრული და ურთიერთპატივისცემაზე დაფუძნებული.

დღეს, საქართველოში მიმდინარე მოვლენები - გაყალბებული არჩევნები, ევროინტეგრაციის შეჩერება და ის ჯოჯოხეთი, რომელსაც არალეგიტიმური მთავრობა ძალოვნების დახმარებით ქუჩაში აწყობს, უმოწყალოდ სცემს საკუთარ მოქალაქეებს, ძალადობს ჟურნალისტებზე და ამ ყველაფერს, მუდმივ რეჟიმში ახალისებს - არ ტოვებს სივრცეს იმისთვის, რომ მოვლენების ცივილიზებულ ჩარჩოში დაბრუნების მოლოდინი გვქონდეს.

29 ნოემბერს საბჭომ საგანგებო განცხადება გაავრცელა - მივმართეთ ესტონეთში საქართველოს საგანგებო და სრულუფლებიან ელჩს, ბატონ ზურაბ ხამაშურიძეს, მოვუწოდეთ, დაეფიქსირებინა საკუთარი პოზიცია მიმდინარე მოვლენებთან დაკავშირებით და გამიჯვნოდა ე.წ. მთავრობის ანტიდასავლურ კურსს.

აღსანიშნავია, რომ ბოლო დღეების განმავლობაში, საქართველოს საგარეო საქმეთა სამინისტროს ასეულობით თანამშრომელი საჯაროდ გაემიჯნა „ქართული ოცნების“ მთავრობის გადაწყვეტილებას ევროინტეგრაციის პროცესის შეწყვეტის თაობაზე, მათ შორის, ესტონეთში საქართველოს საელჩოს დიპლომატები. პროტესტის ნიშნად თანამდებობა დატოვეს საქართველოს ელჩებმა და ელჩის მოვალეობის შემსრულებლებმა ბულგარეთში, ნიდერლანდებში, ლიეტუვაში და იტალიაში.

სამწუხაროდ, საქართველოს ელჩმა ესტონეთის რესპუბლიკაში, არ ჩათვალა საჭიროდ, დაეფიქსირებინა საჯაროდ თავისი პოზიცია და არც ქართულ სახლთან შემდგარა კომუნიკაცია.

ქართული სახლისა და მისი თითოეული წევრისთვის, უმძიმესია, ათწლეულების განმავლობაში პირველად, საქართველოს წარმომადგენლობასთან ურთიერთობის გაწყვეტა, თუმცა ყოველივე ზემოთ აღნიშნულის გათვალისწინებით, ამ ეტაპზე, სხვა გზას ვერ ვხედავთ. ჩვენ ყოველთვის ვიმოქმედებთ ჩვენი სამშობლოს ინტერესებიდან გამომდინარე. "გაუმარჯოს დამოუკიდებელ საქართველოს! გვფარავდეს ღმერთი!", — ნათქვამია გავრცელებულ ინფორმაციაში.