სტრასბურგის მოსამართლეობის კანდიდატი და საქართველოს საკონსტიტუციო სასამართლოს ყოფილი წევრი, კონსტანტინე ვარძელაშვილი მიიჩნევს, რომ კომისიის წევრების ნაწილი ვერ მიიღებს ობიექტურ, პოლიტიკურად მიუკერძოებელ გადაწყვეტილებას მის კანდიდატურასთან დაკავშირებით. კომისიის ზოგიერთი წევრის ინტერესთა კონფლიქტის შესახებ ვარძელაშვილის განცხადებას ტაბულა ავრცელებს.

ვარძელაშვილი ინტერესთა კონფლიქტზე საუბრისას აღნიშნავს:

  • კომისიის თავმჯდომარე, საქართველოს იუსტიციის მინისტრი, მონაწილეობას იღებდა მისი ყოფილი მოადგილის შეფასებაში;
  • საქართველოს საგარეო საქმეთა მინისტრის პირველი მოადგილე, მონაწილეობდა საკუთარი კოლეგების (საქართველოს ელჩების) შეფასებაში;
  • საქართველოს უზენაესი სასამართლოსა და საქართველოს იუსტიციის საბჭოს წევრები ასევე მონაწილეობდნენ მათი კოლეგების (უზენაესი სასამართლოს წევრის და იუსტიციის საბჭოს წევრის) შეფასებაში;
  • კომისიის თავმჯდომარემ, საქართველოს იუსტიციის მინისტრმა, საქართველოს მთავრობის სხვა წარმომადგენლებმა, კომისიის წევრმა - საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, არაერთხელ საჯაროდ გამოხატეს ნეგატიური დამოკიდებულება მის და საქართველოს საკონსტიტუციო სასამართლოს მიმართ იმ გადაწყვეტილებების გამო, რომელიც ბოლო წლებში, მისი მონაწილეობით იქნა მიღებული.

ვარძელაშვილი ამ გარემოებებიდან გამომდინარე, შუამდგომლობით მიმართავს კომისიის თავმჯდომარეს, თეა წულუკიანს; საქართველოს მთავრობის საპარლამენტო მდივანს, შალვა თადუმაძესა და საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარეს, სოფიო კილაძეს არ მიიღონ მონაწილება მისი ან საკონსტიტუციო სასამართლოს სხვა ყოფილი, თუ მოქმედი წევრების შეფასების პროცესში და მათ ნაცვლად კომისიის სათადარიგო წევრები დაინიშნონ.

"ძალიან მნიშვნელოვანია, რომ აღნიშნული კონკურსი მიუკერძოებლად და გამჭვირვალედ ჩატარდეს, არ დარჩეს პასუხგაუცემელი კითხვები, ხოლო კანდიდატები შერჩეული იქნენ სამართლიანი და თანასწორი კონკურენციის პირობებში. კონკურსი არამხოლოდ უნდა ჩატარდეს სამართლიანად, არამედ ასეთად უნდა აღიქმებოდეს საზოგადოებისა და კონკურსში მონაწილეების მიერ", - აღნიშნავს ვარძელაშვილი.

მოსამართლეობის კანდიდატი აღნიშნავს, რომ კონკურსი ამჟამადაც ხარვეზებით მიმდინარეობს. მისი თქმით, საბუთების წარდგენისთვის განკუთვნილი ვადის ამოწურვის შემდეგ, რამდენიმე საათში გამოქვეყნდა გასაუბრებისთვის შერჩეული კანდიდატების სია და შერჩეულ კანდიდატებს 24 საათზე ნაკლები დრო მიეცათ გასაუბრებაზე გამოცხადებისთვის. მას მიაჩნია, რომ ეს გარემოება აჩენს ეჭვს, რომ კონკურსი ფორმალურად მიმდინარეობს.