კოალიცია ძლიერი საქართველოს ერთ-ერთი ლიდერი, ალეკო ელისაშვილი დუშეთის წინასწარი დაკავების იზოლატორში გადაიყვანეს. ამის შესახებ პარტიის პრესსამსახურში განაცხადეს.

მათივე ცნობით, ადვოკატმა ელისაშვილი მოინახულა და თქვა, რომ მას დაზიანებები აღენიშნება. პარტიაში განმარტავენ, რომ ელისაშვილს სახეზე სისხლჩაქცევები აქვს. როგორც ელისაშვილის ადვოკატი და უფლებადამცველი გიორგი რეხვიაშვილი აცხადებს, ოპოზიციონერ პოლიტიკოსს დაზიანებები აქვს სახის და ასევე, ზურგის არეში.

"დაზიანებები აქვს სახის არეში და აგრეთვე, ზურგის არეში. ვფიქრობ, რომ შეიძლება ჰქონდეს ნეკნი მოტეხილი, რადგან ძლიერ ტკივილებს გრძნობს. ჩვენ ვითხოვთ ექსპერტიზას და რენტგენსაც გადაუღებენ და ვნახავთ მის მდგომარეობას, მაგრამ აშკარაა, რომ დაკავებისას განხორციელდა სერიოზული ძალადობა მის მიმართ. ძალის გამოყენებით მოხდა დაკავება. ცემის ფაქტსაც ჰქონდა ადგილი" — განაცხადა ადვოკატმა.

მისი ინფორმაციით, მოითხოვა ელისაშვილის კლინიკაში გადაყვანა, იმისთვის, რომ დადგინდეს რამდენად საყურადღებო დაზიანებები აქვს.

ძლიერი საქართველოს ერთ-ერთი ლიდერი ალეკო ელისაშვილი სამართალდამცავებმა ქორთიად მარიოტთან იმ დროს დააკავეს, როცა 4 ბარიერგადალახული ოპოზიციური პარტიის შეხვედრა დასრულდა.

დაკავების მიზეზი საქართველოს აზერბაიჯანელთა ეროვნული კონგრესის თავმჯდომარის, ალი ბაბაევის განცხადებაა, სადაც წერია, რომ მას ალეკო ელისაშვილმა სიტყვიერი და ფიზიკური შეურაცხყოფა მიაყენა.