აქტივისტი დოდი ხარხელი შსს-ს თანამშრომლებმა მაშინ დააკავეს, როცა მან მცირეწლოვანი შვილი საბავშვო ბაღში მიიყვანა. სოციალურ ქსელში ვრცელდება მისი დაკავების ვიდეო, სადაც პოლიციელი ეუბნება, რომ მოსამართლის განჩინების საფუძველზე უტარდება პირადი ჩხრეკა.

"რუსული ოცნება, რუსული ტერორი, მარტო იმიტომ, რომ აქციებზე ვდგავარ", – ამბობს დოდი ხარხელი დაკავებამდე.

დოდი ხარხელის სახლთან მობილიზებულია რამდენიმე ათეული შსს-ს თანამშრომელი და მოქალაქეები, რომლებიც მის დაკავებას აპროტესტებენ.

NEWS.On.ge-სთან საუბრისას დოდი ხარხელის დედა ელზა ბადაშვილი ამბობს, რომ დოდი პოლიციამ შვილის საბავშვო ბაღთან აიყვანა.

"დოდიმ დატოვა ბავშვი საბავშვო ბაღში და პირდაპირ ბაღის წინ მანქანიდან გადმოიყვანეს მანქანიდან და აიყვანეს. ამდენ ხანს ჰყავდათ მანქანაში, იმიტომ, რომ წერან შემოიყვანეს [სადარბაზოში]. მე კონტაქტზე ვეღარ გავდიოდი. პარალელურ რეჟიმში ესენი [შსს-ს თანამშრომლები] აქ მოვიდნენ ჩხრეკაზე. ახლა როგორც მეუბნებიან, ადვოკატიც იქ არის, 15 წლის შვილი არის ოთახში, რომელიც ძალიან ნერვიულობს", — ამბობს ელზა ბადაშვილი.

აქტივისტ დოდი ხარხელის დაკავებისა და მის სახლში საგამოძიებო ღონისძიებების ჩატარების მიზეზი ამ დრომდე უცნობია.