საქართველოში მიმდინარე მოვლენებს და პარლამენტთან აქციების მიმდინარეობის დროს განვითარებული ძალადობის ფაქტებს საქართველოს ჯანდაცვის მინისტრი, მიხეილ სარჯველაძეც ეხმაურება.

სარჯველაძე არ აღნიშნავს გასულ დღეებში მოქალაქეებზე არაპროპორციული ძალების გამოყენებას და მათ სასტიკ ცემას, რომელთა უმრავლესობაც, მათ შორის მედიის წარმომადგენლებიც, მძიმე დაზიანებებით საავადმყოფოში არიან გადაყვანილი, თუმცა აღნიშნავს რომ "ძალადობას არავითარი გამართლება არ გააჩნია".

მას ასევე არ აქვს ნახსენები სახელისუფლებო საპოლიციო ძალების მხრიდან წყლის ჭავლის და გაზის გამოყენების ფაქტები, მოქალაქეების წინააღმდეგ, რომლებიც 28 ნოემბრიდან ქართული ოცნების გადაწყვეტილებას შეაჩერონ ევროკავშირში გაწევრიანების მოლაპარაკებები აპროტესტებენ.

"არავითარი გამართლება არ გააჩნია ძალადობას, სულერთია, ვისი მხრიდანაც არ უნდა მომდინარეობდეს ის აქედან გამომდინარე, ჩემი პოზიცია ამასთან დაკავშირებით
აბსოლუტურად ურყევია და ძალადობრივი ქმედებები გაუმართლებელი და
შეუწყნარებელია", — აცხადებს იგი.

მისი თქმით, სამინისტრო საზოგადოებას განახლებულ ინფორმაციას უწყვეტ რეჟიმში
აწვდის, იმის შესახებ, თუ რა სახის სამედიცინო მომსახურება გაეწიათ დაშავებულებს,
მიმდინარე აქციებთან დაკავშირებით.

"სასწრაფო სამედიცინო დახმარების ბრიგადები განთავსებულია საჭიროზე მეტი
რაოდენობით, იმ ადგილებზე, სადაც იმართება ეს აქციები და შესაბამისად,
პრაქტიკულად მყისიერი სამედიცინო დახმარება უკლებლივ ყველა ადამიანისთვის
ვისაც არ უნდა დაჭირდეს, უზრუნველყოფილი იყო ადგილზეც და მთელი ამ დღეების
განმავლობაშიც", — აღნიშნა მიხეილ სარჯველაძემ.

მანვე აღნიშნა, რომ გასული დღე-ღამის განმავლობაში, მაშინ როდესაც სამთავრობო ძალებმა მოქალაქეების წინააღმდეგ მხუთავი აირი გაუშვეს და ამასთან, დილით ვაკის პარკამდე სდიეს — აქციებიდან კლინიკაში 37 ადამიანი გადაიყვანეს.

"ამ 37 ადამიანიდან, 24 ადამიანი არის აქციის მონაწილე, 12 ადამიანი პოლიციელი და
მედიის წარმომადგენელი, უნდა ვთქვათ, რომ საკმაოდ მძიმეა ის ტრავმები, რომლითაც
შედიან პოლიციელები, მათ აღენიშნებათ დაზიანებები, რომელიც გამოწვეულია, მათ
შორის, მძიმე მეტალის ნივთების სროლით და ა.შ. საკმაოდ საყურადღებო და სახიფათო
ტრავმებზეა საუბარი. ყველას მოვუწოდებ, უკლებლივ, დავიცვათ არა უბრალოდ
მშვიდობა და მართლწესრიგი, არამედ ერთმანეთის ჯანმრთელობა. მნიშვნელოვანია,
ყველას კარგად ესმოდეს, რომ პიროტექნიკის დამიზნებით სროლა ადამიანისთვის, მაშინ
როცა არაერთხელ გვისაუბრია საზოგადოებას იმასთან დაკავშირებით, რომ ეს სახიფათო
პროდუქტი, საზიანოა. ფრთხილად უნდა იყვნენ ადამიანები, რათა გაუფრთხილდნენ
სხვა ადამიანების სიცოცხლესა და ჯანმრთელობას", — განაცხადა მიხეილ სარჯველაძემ.