ყოველგვარი ირონიის გარეშე, საზოგადოებრივ მაუწყებელში შეჭრილ ნაციონალებს მინდა მადლობა გადავუხადო გუშინდელი ეთერისთვის, რადგან მათ, ამ ეთერით, ქართულ საზოგადოებას კიდევ ერთხელ შეახსენეს, თუ როგორია ნაციონალის ნამდვილი სახე, — განაცხადა საქართველოს პრემიერ-მინისტრმა ირაკლი კობახიძემ დღევანდელ პრესკონფერენციაზე.

"მინდა, ასევე, გამოვეხმაურო საზოგადოებრივ მაუწყებელში ნაციონალური მოძრაობის შეჭრის ფაქტს. ამ აქტით, მათ კიდევ ერთხელ შეგვახსენეს, რომ ტელევიზიებში შეჭრა ნაციონალური მოძრაობის უცვლელი ხელწერაა. ამასთან, ყოველგვარი ირონიის გარეშე, საზოგადოებრივ მაუწყებელში შეჭრილ ნაციონალებს მინდა მადლობა გადავუხადო გუშინდელი ეთერისთვის, რადგან მათ, ამ ეთერით, ქართულ საზოგადოებას კიდევ ერთხელ შეახსენეს, თუ როგორია ნაციონალის ნამდვილი სახე ბოდიშს ვუხდი რამდენიმე გულწრფელ და შეცდომაში შეყვანილ ადამიანს, რომლის გამოსწორება, მგონია, რომ ჯერ კიდევ შესაძლებელია", — განაცხადა პრემიერმა.

შეგახსენებთ, რომ გუშინ მოქალაქეები საზოგადოებრივი მაუწყებლის შენობასთან 2 მოთხოვნით მივიდნენ. ისინი საეთერო დროის დათმობას მოითხოვდნენ, რათა მთელი ქვეყნისთვის ეთქვათ, რა პროცესები ვითარდება ოცნების ხელისუფლების EU-ში გაწევრიანების მოლაპარაკებების შეჩერების შემდეგ, სურდათ ასევე ესაუბრათ იმაზე, რეალურად რა პრობლემები დგას ქვეყანაში, რაზეც, მათი თქმით, ქვეყნის ბიუჯეტით დაფინანსებული ტელევიზია დუმს; მეორე მოთხოვნა, არხის ხელმძღვანელობის, კერძოდ: პირველი არხის დირექტორის, თინათინ ბერძენიშვილის და სამეურვეო საბჭოს თავმჯდომარის, ვასილ მაღლაფერიძის გადადგომა იყო. საპროტესტო აქციისა და ხმაურიანი მოლაპარაკებების შემდეგ, თინათინ ბერძენიშვილი საინიციატივო ჯგუფს ეთერის დათმობაზე დასთანხმდა. გადაცემა, რომელიც პირდაპირი ეთერით გადაიცემოდა 20:00 საათზე უნდა დაწყებული, მაგრამ მცირედი დაგვიანებით დაიწყო.