შინაგან საქმეთა სამინისტრო მომიტინგეებს შეკრებისა და მანიფესტაციის კანონით დაშვებულ ნორმების დარღვევასა და ძალადობრივ ქმედებებში ადანაშაულებს. როგორც ბრიფინგზე მინისტრის მოადგილე ალექსანდრე დარახველიძემ განაცხადა, საპროტესტო აქცია არაერთხელ გასცდა კანონის ფარგლებს და შედეგად, მისი ინფორმაციით, დაშავდა შინაგან საქმეთა სამინისტროს 42 თანამშრომელი.

"აქციის მონაწილეთა ნაწილმა გადაინაცვლა პარლამენტის
უკანა შესასვლელის მიმდებარედ და დაიწყეს პროვოკაციული ქმედებების
განხორციელება, რაც გამოიხატა პოლიციის მიმართ სიტყვიერ და ფიზიკურ
დაპირისპირებაში. ასევე, აქციის მონაწილეები პარლამენტის უკანა
შესასვლელთან და ჩიტაძის ქუჩაზე მყოფ პოლიციელებს ესროდნენ ქვებს, შუშის
ბოთლებს, პიროტექნიკას, სხვადასხვა რკინის საგანს, კვერცხებს, საღებავებს,
პოლიციელებს აყენებდნენ სიტყვიერ შეურაცხყოფას. აქციის მონაწილეთა მხრიდან
განხორციელებული ძალადობრივი ქმედებების შედეგად, რამდენიმე პოლიციელმა
სხვადასხვა, მათ შორის, მძიმე სახის დაზიანება მიიღო.
სიტუაციის დეესკალაციისა და სამართალდამცველთა სიცოცხლისა და ჯანმრთელობის
დაცვის მიზნით, შინაგან საქმეთა სამინისტრომ მიიღო გადაწყვეტილება,
საპატრულო და კრიმინალური პოლიციის წარმომადგენლები ჩაენაცვლებინა
განსაკუთრებულ დავალებათა დეპარტამენტის სპეციალური აღჭურვილობის მქონე
თანამშრომლებით, თუმცა სამართალდამცველთა მიმართ ძალადობრივი ქმედებები
მაინც გრძელდებოდა საათების განმავლობაში.", — განაცხადა დარახველიძემ.

მინისტრის მოადგილის მტკიცებით, მიუხედავად აქციის მონაწილეების მიმართ სამართალდამცველების მხრიდან გაკეთებული არაერთი მოწოდებისა, ასევე, შინაგან საქმეთა სამინისტროს მიერ ოფიციალურად გავრცელებული განცხადებებისა, რომ მათ შეეწყვიტათ ძალადობრივი ქმედებები და პროტესტი გამოეხატათ მშვიდობიან ფორმებში, აქციის მონაწილეები განაგრძობდნენ კანონსაწინააღმდეგო ქმედებებს.

"ხაზგასმით აღვნიშნავთ, რომ აქციის მონაწილეთა დესტრუქციული ქმედებები, საფრთხეს უქმნიდა როგორც პროტესტის მონაწილეთა, ასევე, შინაგან საქმეთა სამინისტროს თანამშრომელთა ჯანმრთელობას და სიცოცხლეს. პროტესტის გამომხატველთა ქმედებები, არაერთხელ გასცდა შეკრება-მანიფესტაციის კანონით განსაზღვრულ ჩარჩოებს და გადაიზარდა
ძალადობრივ ქმედებებში.", — განაცხადა მინისტრის მოადგილემ.

მან კიდევ ერთხელ გაიმეორა, რომ მომიტინგეები ხელოვნურად ხერგავდნენ რუსთაველის გამზირს, აზიანებდნენ ინფრასტრუქტურას და ცეცხლს უკიდებდნენ ნაგვის ურნებს და ხის სკამებს.

დარახველიძის ინფორმაციით დაკავებულია 107 პირი, მისივე ინფორმაციით, დაშავებულია შინაგან საქმეთა სამინისტროს 42 თანამშრომელი.

"კიდევ ერთხელ ვაფრთხილებთ და მოვუწოდებთ აქციის მონაწილეებს, პროტესტი
გამოხატონ კანონით დასაშვებ ფარგლებში, წინააღმდეგ შემთხვევაში, შინაგან
საქმეთა სამინისტრო, სიტუაციის დეესკალაციის მიზნით, გაატარებს კანონით
მინიჭებულ ყველა ღონისძიებას.", — აცხადებს ალექსანდრე დარახველიძე.