გურიაში, შეკვეთილის მიმდებარე ტერიტორიაზე, ციცინათელას პარკთან დღეს, 23 აგვისტოს, დაახლოებით 9 საათზე საპირისპირო მიმართულებით მოძრავი ორი სამგზავრო მიკროავტობუსი ერთმანეთს შეეჯახა. საზოგადოებრივი მაუწყებლის აჭარის ტელევიზიის ინფორმაციით, შემთხვევის შედეგად 29 ადამიანი დაშავდა, საიდანაც 19 საავადმყოფოში მკურნალობს.

აჭარის ტელევიზიის მიერ გავრცელებულ კადრებში ჩანს, რომ ავარიაში მონაწილე ერთ-ერთი მიკროავტობუსი გადაბრუნებულია.

შინაგან საქმეთა სამინისტროში აღნიშნავენ, რომ ავარიის დროს დაშავებულთაგან ორ პირს მოტეხილობები აღენიშნება. უწყება საქმეს სისხლის სამართლის კოდექსის 276-ე მუხლის პირველი ნაწილით იძიებს. ამ მუხლით, მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.

შსს-ს პრესსამსახურში ამბობენ, რომ ამ ეტაპზე უკვე გამოკითხულია ორივე მიკროავტობუსის მძღოლები.