22 ნოემბერს, 16:00 საათზე, საქალაქო სასამართლოსთან აქცია "უშენოდ ვერ გამოვა" დაანონსდა. აქცია საქალაქო სასამართლოსთან ომარ ოკრიბელაშვილისა და საბა მეფარიშვილის პროცესის პარალელურად გაიმართება.

"ომარ ოკრიბელაშვილსა და საბა მეფარიშვილს 14 მაისს, "რუსული კანონის" წინააღმდეგ აქციაზე, რკინის ჯებირის ჯგუფურად დაზიანებას ედავებიან. ჯებირის მეპატრონე შინაგან საქმეთა სამინისტროა. ზიანი, რომელიც უწყებას მიადგა, ექსპერტიზის დასკვნის თანახმად, 400 ლარია. ამ ყველაფრისთვის მათ 3-6 წლამდე პატიმრობა ემუქრებათ.

ეს არის განსხვავებული აზრისა და მშვიდობიანი პროტესტის მონაწილეების დაშინების ღია მცდელობა. საბას და ომარს სჯიან იმიტომ, რომ ხვალ შენ შეგეშინდეს პროტესტის დაფიქსირების.

ასეთ ბრძოლაში არავინ უნდა დარჩეს მარტო! საბა და ომარიც გამოვლენ, ოღონდ, უშენოდ ვერა! 22 ნოემბერს, 16:00-ზე, საქალაქო სასამართლოს ეზოში, უშენოდ ვერ გამოვა!" — ნათქვამია აქციის ორგანიზატორების განცხადებაში.

ცნობისთვის, "რუსული კანონის" საწინააღმდეგო აქციების დროს, ჯებირის დაზიანებისთვის დაკავებული ომარ ოკრიბელაშვილისა და საბა მეფარიშვილის სასამართლო პროცესი ხვალისთვის გადაიდო.

პროცესი დღეს, 21 ნოემბერს, 16:30 საათზე უნდა გამართულიყო, თუმცა 22 ნოემბრის 16:00 საათამდეა გადადებული.