მწერალი ანა კორძაია სამადაშვილი დღეს ილიაუნის წინ, ღია ცის ქვეშ საჯარო ლექციას წაიკითხავს თემაზე — ცენზურა ტოტალიტარული რეჟიმის პირობებში. მისი თქმით, როცა სტუდენტებისგან ლექციის ჩატარების წინადადება მიიღო, ძალიან გაუხარდა, რომ ეს პატივი ხვდა წილად. მისივე თქმით, "ლექციის თემა თემა უნდა იყოს ისეთი, რაც აინტერესებთ მის სტუდენტებს და მაშინ შეიძლება ვიღაცამ ყურად იღოს ის, რასაც უნივერსიტეტი ამბობს".

"გულწრფელად რომ გითხრათ, ქუჩაში ლექციის ჩატარების იდეა არ მომივიდოდა არასდროს თავში და როცა ჩემმა არაჩვეულებრივმა სტუდენტებმა ამ წინადადებით დამირეკეს, ვიყავი ძალიან გახარებული, რომ ეს პატივი მხვდა წილად, ძალიან უჩვეულო შეგრძნებაა, როცა გამოდიხარ გარეთ და შენი ქალაქის თვალწინ კითხულობ იმას, რასაც შენ ძალიან ინტიმურ გარემოში, თუნდაც 120 სტუდენტის გარემოში იტყვი. უბრალოდ ცოტა სხვა დროა, არეული დროა და ზუსტად ის დროა, რომლის შესახებაც საუკუნეების განმავლობაში ჩემთვის ძალიან საყვარელი მხატვრული ლიტერატურა ჰყვებოდა. მე ვკითხულობ ლიტერატურას, ამის მეტი არაფერი ვიცი. ამიტომ ვიფიქრე, რომ თემა უნდა იყოს ისეთი, რაც აინტერესებთ ჩემს სტუდენტებს, რაც არის საინტერესო ჩემთვის და მაშინ შეიძლება ვიღაცამ ყურად იღოს ის, რასაც ჩემი უნივერსიტეტი ამბობს", — განაცხადა ანა კორძაია-სამადაშვილმა.

ანა კორძაია-სამადაშვილის საჯარო ლექცია ილიაუნის მიმდებარე ტერიტორიაზე ამ წუთებში იწყება.